Pałata zastałasia pałataj

Prajekt papravak, jakija b rabili vybarčy praces prazrystym, byŭ padrychtavany letaś, ale ŭniesieny na razhlad sesii tolki paśla taho, jak deputaty U.Parfianovič, S.Skrabiec i V.Frałoŭ abvieścili haładoŭku pratestu. Haładoŭka była spynienaja za dzień da razhladu papravak u pałacie, ca spasyłkaju na toje, što mety haładoŭki častkova dasiahnutyja.Vyniki hałasavańnia akazalisia pradkazalnymi: prapanovu «respublikancaŭ» padtrymali 8 čałaviek, suprać byŭ 71. Uta Capf, kiraŭnica delehacyi Parlamenckaj asamblei ABSE, jakaja nazirała za abmierkavańniem u pałacie, zajaviła, što bolšaść arhumentaŭ praciŭnikaŭ papravak nie vytrymlivaje krytyki.

Deputaty, jakija pravodzili 18-dzionnuju haładoŭku, zajavili ab svaim namiery «mianiać padychody i pierachodzić da inšych metadaŭ pracy». Pra heta 22 červienia na pres-kanferencyi na pł.Niezaležnaści paviedamiŭ hienerał Frałoŭ. Jon mieŭ na ŭvazie najpierš sustreču z deputatami 21 lipienia, na jakuju jon spadiajecca sabrać «jak maha bolš ludziej».

Akredytavanych žurnalistaŭ ź niezaležnych vydańniaŭ, darečy, u Dom uradu na abmierkavańnie papravak nie puścili.

Mikoła Buhaj

***

Jak skančalisia viadomyja haładoŭki

Haładoŭka — niebiaśpiečnaja sprava, jana moža pryvieści nia tolki da surjoznych prablem sa zdaroŭjem, ale i da śmierci. Jaskravy prykład — haładoŭka irlandzkich revalucyjaneraŭ u 1981 h. Padčas jaje pamierli 10 čałaviek. Raspačaŭ pratest bajec IRA i člen parlamentu Bobi Sendz. U zvarocie da brytanskich uładaŭ jany pisali: «Tolki hučny hołas irlandzkaha narodu i hramadzkaja dumka moža viarnuć prytomnaść brytanskamu ŭradu. Usie my budziem trymać haładoŭku da śmierci, pakul urad nia pojdzie nasustrač našym patrabavańniam ab adnaŭleńni statusu palityčnych źniavolenych». Tetčer nie sastupiła. 27-hadovy Sendz pamior na 66-y dzień. Najbolš pratrymaŭsia Kijeran Doerci — 73 dni, najmienš — Marcin Charsan, 46 dzion. 14 bajcoŭ IRA vyžyli. Łoŭrens Makhoŭn pravioŭ biaź ježy 70 dzion, astatnija — 20—60 dzion.

Čatyry razy na dzień pierad imi stavili talerki ź ježaju. Haładoŭniki viartali jaje niekranutaju. Administracyja viaźnicy nie karmiła ich prymusova, paśla taho jak adnamu ź irlandcaŭ zondam byŭ paškodžany straŭnik i toj pamior.

U SSSR haładoŭki pačali prynosić vyniki tolki padčas pierabudovy. Padčas haładoŭki ŭ Čystopalskaj turmie 8 śniežnia 1986 hodu pamior Anatol Marčanka. Jon haładaŭ sa žniŭnia, patrabujučy vyzvaleńnia ŭsich palityčnych viaźniaŭ. I jahonaja śmierć nie była marnaju: u listapadzie byli vyzvaleny źniavolenyja pa palityčnych matyvach žančyny. Padčas apošniaj haładoŭki Andreja Sacharava jamu patelefanavaŭ sam Harbačoŭ…

Nie zaŭždy haładoŭki byli sumlennymi: uzimku 1986 h. savieckaja televizija praź dzień demanstravała siužety z Łafajet-parku nasuprać Biełaha domu, dzie doktar Marcin Hajder 218 dzion haładavaŭ u namiocie suprać honki ŭzbrajeńniaŭ. Darečy, dniami 74-hadovy Hajder pamior u domie sastarełych.

Aleh Rajaviec, Rusłan Raviaka

• 0
• 0
• 0
• 0
• 0
• 0
• 0
• 0