Milicyja znajšła niečakanuju nahodu aštrafavać minčuka za rolik u sacsietkach

Andrej (imia źmieniena) trapiŭ u niečakanuju dla siabie situacyju, prosta raźmiaściŭšy zabaŭny post u sacsietcy. Žurnalistu Tochka.by stali viadomyja padrabiaznaści historyi. 

U adzin ź viečaroŭ chłopiec ź siabram na aŭto vybraŭsia ŭ centr horada. Za rulom byŭ tavaryš, tamu Andrej nie admoviŭ sabie ŭ zadavalnieńni vypić trochi piva. Znajomy, jaki ŭziaŭ na siabie rolu kiroŭcy, stvaryŭ nieabchodnyja ŭmovy: pryparkavaŭ mašynu i ŭklučyŭ muzyku.

U niejki momant mima prachodziŭ mužčyna ŭ rostavaj lalcy, jon pačaŭ padtancoŭvać pad rytmy z aŭto. Chłopcy vyrašyli źniać viasiołaha minaka na smartfon.

«Na videa ja nie piŭ, butelka była ledź bačnaja. Čałaviek, prahladajučy videa, adrazu i nie zrazumieje, jaki napoj u mianie ŭ rukach», — uspaminaje Andrej.

Usie paśmiajalisia i razyšlisia. A minak navat byŭ uznaharodžany za svaje tancy — 10 rubloŭ čajavych.

Atrymaŭsia paciešny rolik, i Andrej vykłaŭ jaho na svajoj staroncy ŭ sacsietcy. Zatym dapiŭ u mašynie tyja 0,33 ł piva, a paśla zajezdu na pierakus adpraviŭsia dadomu.

Na nastupny dzień chłopca razbudziŭ zvanok z RUUS. Hołas na tym kancy paśla pradstaŭleńnia skazaŭ, što jość pytańni da raźmieščanaha videamateryjału: tancujučaha čałavieka zapadozryli va ŭžyvańni zabaronienych rečyvaŭ.

Andrej staŭ abaraniać mižvolnaha hieroja rolika i padkreśliŭ, što mužčyna znachodziŭsia ŭ absalutna adekvatnym stanie. Im udałosia pierakinucca paraj słoŭ, i akcior u rostavaj lalcy byŭ nie suprać traplańnia ŭ čužyja sacsietki.

Na hetym razmova ź milicyjanieram zaviaršyłasia.

Ale praz hadzinu adbyŭsia jašče adzin zvanok, i pravaachoŭnik nastajaŭ na tym, kab aŭtar kantentu ŭsio ž padjechaŭ i daŭ pakazańni ŭ dačynieńni da «tancora».

«Pryjazdžaju da čatyroch viečara (skazali pryjechać, jak tolki zmahu). Mianie viaduć u kabiniet, usadžvajuć i niešta moŭčki pišuć», — apisvaje situacyju Andrej. U niejki momant jon pacikaviŭsia, dla čaho nieabchodnaja jaho prysutnaść.

I tut vyśvietliłasia, što aŭtara videa pryciahvajuć da adkaznaści za raśpićcio ałkaholnych napojaŭ u hramadskim miescy.

«Nie bojsia, my zaraz vypišam pratakoł, heta budzie prosta papiaredžańnie, biez štrafu», — patłumačyŭ supracoŭnik RUUS.

Andrej pračytaŭ: usio sapraŭdy abmiažoŭvałasia tolki papiaredžańniem. Padpisaŭ i źjechaŭ. Bolš jaho nie tryvožyli.

Ale aktyŭny karystalnik sacsietak nie moh sabie ŭjavić, što jaho vypadak moža ličycca raśpićciom ałkaholnych napojaŭ u hramadskim miescy.

Jakija parušeńni čaściej fiksujuć praz sacsietki?

U Biełarusi sapraŭdy možna atrymać štraf ci inšaje administracyjnaje i navat kryminalnaje pakarańnie na padstavie videazapisu, jaki trapiŭ u internet.

Zhodna sa art. 6.3 PIKaAP, dokazami źjaŭlajucca lubyja faktyčnyja danyja, na asnovie jakich možna ŭstalavać najaŭnaść abo adsutnaść pravaparušeńnia. Ich krynicaj moža być luby nośbit infarmacyi: materyjały fota– i kinazdymki, huka– i videazapisy i tamu padobnaje (art. 6.11 PVKaAP).

Rolik mohuć adpravić u milicyju vidavočcy, albo supracoŭniki sami znojduć jaho ŭ sacsietkach. 

Pierad nakładańniem štrafu milicyjaniery pavinny vyznačyć asobu parušalnika, čas i miesca zdymki. 

Čaściej za ŭsio da štrafaŭ pryvodziać zafiksavanyja parušeńni PDR. Heta ahresiŭnaje kiravańnie, prajezd na čyrvony sihnał śviatłafora, parkoŭka na hazonie i hetak dalej. Taksama da adkaznaści pryciahvajuć za chulihanstva (bojki, vandalizm), prodaž zabaronienych tavaraŭ, parušeńnie aŭtarskich pravoŭ.

Nu i za raśpićcio śpirtnoha (u tym liku słabaałkaholnych napojaŭ i piva) u hramadskich miescach. Pa artykule 19.3 KaAP za heta mohuć pakarać štrafam da 8 bazavych vieličyń (na momant napisańnia materyjału — Br360).

Što ŭ Biełarusi ličycca hramadskim miescam?

Andrej vykazaŭ sumnieŭ u tym, što butelku na videa možna identyfikavać jak piva. Da taho ž jon nie piŭ padčas zdymki. Ale bolš za ŭsio hieroja ździviła toje, što asabisty aŭtamabil ličycca hramadskim miescam.

Adnak, pavodle milicyi, heta tak, kali mašyna znachodzicca, jak kažuć, na vidu, u dadzienym vypadku — na ahulnadastupnaj parkoŭcy.

Hramadskim miescam pryznajucca lubyja terytoryi, adkrytyja dla svabodnaha dostupu i znachodžańnia ludziej. U pryvatnaści, vakzały, vulicy, parki, kramy, teatry, dvary, padjezdy žyłych damoŭ.

Nie źjaŭlajucca takimi pryvatnyja žyłyja pamiaškańni i aharodžanyja ŭčastki pry ich. A jašče bałkony i łodžyi, ale dziejańni tam nie pavinny parušać spakoj susiedziaŭ.

Akramia taho, da publičnaj prastory, pa sutnaści, adnosiacca i sami staronki ŭ sacsietkach, jakija znachodziacca ŭ adkrytym dostupie. Raźmieščanyja tam videa stanoviacca ahulnadastupnym dokazam, tłumačyć «Točka».

• 0
• 0
• 5
• 8
• 2
• 0
• 5
• 0