Biełpoł: «Epštejn nie dajechaŭ da Biełarusi». A kim byli baćki jaho kachanki Karyny Šulak?
Niahledziačy na toje, što skandalna viadomy amierykanski finansist Džefry Epštejn niekalki razoŭ atrymlivaŭ vizu ŭ Biełaruś, jon usio ž nie byŭ u našaj krainie. Takoj infarmacyjaj z «Našaj Nivaj» padzialilisia ŭ Belpol.
Pra asudžanaha za seksualnyja złačynstvy finansista Džefry Epštejna, jaki ździejśniŭ samahubstva ŭ turemnaj kamiery ŭ Ńju-Jorku ŭ 2019 hodzie, hučna zahavaryli znoŭ: Ministerstva justycyi ZŠA dniami apublikavała čarhovuju, maštabnuju porcyju dakumientaŭ pa jaho spravie.
Siarod inšaha, tam jość skrynšoty listavańnia Epštejna z Karynaj Šulak — biełaruskaj dantystkaj, ź jakoj jany byli znajomyja z 2010 hoda. Vypusknica BDMU pryjechała ŭ ZŠA ŭ 2009 hodzie — tady dziaŭčynie było 20 hadoŭ.
U 2010‑m Epštejn jakraz vyzvaliŭsia z turmy, prabyŭšy tam 13 miesiacaŭ pa abvinavačvańni va ŭciahvańni niepaŭnaletniaj u prastytucyju. Pa infarmacyi miascovych ŚMI, Šulak akazałasia ledź nie adzinaj, chto byŭ ź im tady pobač: šmatlikija pryjacieli i znajomyja adviarnulisia ad biznesmiena praz seksualny skandał.
U jakaści padziaki Epštejn dapamoh Šulak atrymać licenzii dla pracy dantystam u ZŠA, apłaciŭ darahoje lačeńnie maci, a ŭ vyniku ŭklučyŭ u zaviaščańnie: biełaruscy dastalisia 50 miljonaŭ dalaraŭ i ceły bukiet nieruchomaści, siarod jakoj i ŭłasnaść Epštejna na skandalna viadomym vostravie Litł-Sient-Džejms i susiednim Hrejt-Sient-Džejms.
Biełaruska była važnym čałaviekam u žyćci miljaniera: jany płanavali ažanicca, da taho ž Karyna stała apošnim čałaviekam, ź jakim jon paśpieŭ parazmaŭlać pierad śmierciu. Chacia ich stasunki, vidavočna, nielha było nazvać prostymi: sa źlitaj pryvatnaj pierapiski pamiž finansistam i dantystkaj bačna, što jany niaredka kanfliktavali.
Adzin z momantaŭ, jaki davioŭ dziaŭčynu da śloz, nakolki možna zrazumieć z dyjałohu, źviazany sa sprečkaj nakont pryvatnaści Epštejna ŭ masažnym kabiniecie i jaho ciahi da maładych dziaŭčat.
«Ja starajusia nastolki, nakolki mahu, razumieć tvaje kłopaty — uzrost Džesiki, maju schilnaść źviartać uvahu na maładziejšych žančyn, toje, što budzie praź dziesiać hadoŭ; tvajo rydańnie zamiest udziačnaści za naša ŭzajemnaje kachańnie; tvajo rydańnie, a potym adpraŭku mnie paviedamleńnia, u jakim ty tłumačyš, jakuju škodu ja, na tvaju dumku, pryčyniŭ tvajmu dniu», — piša Epštejn.
A što z baćkami Karyny Šulak?
Na skrynšocie z zapytam u konsulstva pa vizy bačna, što Karyna chacieła pryjechać dadomu i pryniać u siabie Epštejna ŭ mai 2016 hoda. «Mistar Epštejn źbirajecca spynicca ŭ majoj siamji ŭ Minsku, a taksama jon choča kupić kvateru».
Pa infarmacyi Belpol, Epštejn pa niejkich pryčynach u Biełaruś tak i nie dajechaŭ. Ale kvatera ŭ vyniku ŭsio ž była kuplenaja.
Zhodna z bazami vałodańnia nieruchomaściu, na baćku Karyny Fiodara Šulaka, jaki značycca pradprymalnikam, u Minsku zarehistravanaja kvatera ŭ rajonie Kamiennaj Horki, a na maci Taćcianu, jakaja, zhodna z apošnimi viadomymi źviestkami była biespracoŭnaj — kvatera ŭ Drazdach i dom u Viciebskaj vobłaści.
Akurat kvatera ŭ Drazdach była nabytaja ŭ 2016 hodzie, što bačna pa Adzinym dziaržaŭnym rehistry nieruchomaj majomaści.
Sama Karyna naradziłasia ŭ vioscy Valarjanava pad Minskam, a padčas mierkavanaha pryjezdu Epštejna płanavała raźmiaścić jaho ŭ zusim inšym siamiejnym hniaździe — na vulicy Karyckaha ŭ rajonie mietro «Partyzanskaja».
Dadatkova ŭžo viadoma, što ŭ 2013 hodzie Epštejn pieravioŭ na rachunak Fiodara Šulaka 20 tysiač dalaraŭ, i jašče pa 25 tysiač u 2014‑m i 2016‑m hadach, pisała «Lusterka».
Šulaki-starejšyja paznajomilisia z kachankam dački asabista, sami prylacieŭšy ŭ ZŠA: adzin z viadomych vizitaŭ siamji ŭ ZŠA datujecca 2012 hodam, taksama Fiodar i Taćciana naviedvali Amieryku ŭ 2017 hodzie. Apošni ž raz baćka Karyny byŭ u patencyjnaha ziacia za miesiac da aryštu.
Ciapier, zhodna ź infarmacyjaj eks-siłavikoŭ, baćki Šulak u razvodzie.
«Naša Niva» — bastyjon biełaruščyny
PADTRYMAĆCiapier čytajuć
Za minuły hod nasielnictva Biełarusi skaraciłasia jašče na 53 tysiačy čałaviek9
Kamientary