Uładzimier Parfianovič adkazvaje na pytańni karespandenta «NN» pra svoj udzieł u adbudovie Vierchniaha horadu i dzielicca svaimi razvahami nakont taho, što ciapier adbyvajecca pamiž vulicaj Handlovaj dy Haradzkim Vałam.
«NN»: Bolšaść ludziej viedajuć Vas jak alimpijskaha čempijona dy palityka. Adnak Vy taksama byli suŭładalnikam firmy «Bilim». Čym jana zajmałasia?
Uładzimier Parfianovič: Firma «Bilim» stvarałasia ŭ 1998 h. mienavita dla taho, kab uznavić histaryčnuju zabudovu staroha horadu. Na hetym poli ŭžo pracavała inšaja kampanija — «Stary Miensk». Ale ŭ jaje nie stavała hrošaj dy investaraŭ, kab zdužać hetuju pracu. Kali «Bilim» prapanavaŭ svajo vyrašeńnie prablemy, Mienski harsaviet dy harvykankam pieradali 4 budynki ŭ Vierchnim horadzie va ŭłasnaść firmy. Dy jakija tam budynki — razvaliny, navat ścienaŭ nie było. U budynku, dzie ciapier českaja ambasada, stajała tolki adna ściana, padpiortaja čatyrma pałkami. My spytalisia ŭ tahačasnaha mera Jarmošyna: što zrabić sa ścianoj? Jon skazaŭ: zvalić.
Dla adbudovy «Bilim» adšukaŭ kredyty na sumu kala $2,5 młn. Akramia niepasredna budaŭničych rabotaŭ, firma rekanstrujavała navakolnuju terytoryju, pabudavała darohi, kamunikacyi ahulnym koštam bolš za $200 tys. — inakš kažučy, vykanała toje, što horad «nakłaŭ» jak umovu dla realizacyi hetaha prajektu. Usie raboty vialisia ŭ adpaviednaści z patrabavańniami Kamitetu pa achovie histaryčnych pomnikaŭ.
«NN»: Mabyć, niemałuju Vy vystavili arendu za ofisnyja płoščy takoj jakaści dy jašče ŭ histaryčnym centry.
UP: Tak, arendnaja płata, jakuju my brali, była našmat bolšaja za tuju, jakuju braŭ horad u analahičnych miescach. Ale ŭ dziaržbiudžet taksama išli vysokija padatki. My zmahli pierakanać pryjści ŭ Vierchni horad Suśvietny bank, Eŭrapiejski bank rekanstrukcyi j raźvićcia, českaje pasolstva. Heta była našaja praca z kankretnymi ludźmi. Heta pryhožyja budynki, tam jość navat dvoryk z fantanam. Usio heta było zroblena spačatku na kredyty, a potym na srodki arandataraŭ. Pracavać było vielmi ciažka, bo nad nami ŭvieś čas visieŭ zaniesieny mieč «sacyjalistyčnaj spraviadlivaści», jaki, urešcie, nas rubanuŭ: źviartajučysia da parlamentu j uradu ŭ 2003 h., Łukašenka padniaŭ mera Paŭłava dy zahadaŭ, kab jon adabraŭ usiu ŭłasnaść u histaryčnaj častcy horadu.
Łukašenka padmanuŭ deputataŭ, kali zajaviŭ, nibyta my ŭziali damy ŭ dziaržavy dy zdali ich u arendu. Prabačcie, ale tady čamu vy sami nie zdavali ich u arendu? Usia sprava ŭ tym, što my ŭziali razvaliny, a pabudavali damy. Zvyčajnaja sprava: niechta buduje hatel ci ofisy, zdaje ŭ arendu dy zarablaje na hetym hrošy. Heta narmalny cyvilizavany biznes, jaki isnuje va ŭsich krainach śvietu, akramia Biełarusi. Dakładniej, im tut mohuć zajmacca tolki «praprezydenckija» struktury.
Pieršym, ŭ kaho adabrali budynki, byŭ «Bilim». Isnuje, nakolki ja viedaju, sakretnaje rasparadžeńnie prezydenta, ź jakim byŭ aznajomleny Kamiankoŭ, staršynia Vyšejšaha haspadarčaha suda, dy Tozik. Mnie raskazvali, što Kamiankoŭ dy Tozik aznajomili z rasparadžeńniem sudździaŭ, jakija pravodzili sudovaje pasiadžeńnie, vynikam jakoha była «eksprapryjacyja» budynkaŭ. Kopii hetaha rasparadžeńnia zachavalisia. U histaryčnym centry była niezakonna likvidavanaja pryvatnaja ŭłasnaść, biez anijakaj kampensacyi ŭładalnikam za toje, što jany adrestaŭravali. Paśla hetaha ja vyjšaŭ ź firmy, bo ź «Bilimam» tak abyšlisia jašče j z-za mianie, z-za majoj pazycyi ŭ parlamencie.
«NN»: Kab Vas nia «vykinuli» ź Vierchniaha horadu, što b Vy tam zrabili?
UP: Firma źbirałasia pryciahnuć investycyi dy adnavić vulicu Handlovuju — heta bolš za 20 damkoŭ, jakija stajali ŭzdoŭž Śvisłačy. Na heta spatrebiłasia b vialikaja suma — $20—30 młn, adnak u nas była mahčymaść znajści takija investycyi.
Poŭny varyjant artukułu čytajcie ŭ hazecie "Naša Niva"
Hutaryŭ Aleś Kudrycki
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary