Futbolny sezon pačniecca ŭ krasaviku
Biełaruski futbolny sezon-2005 pačniecca 3 krasavika — tak vyrašyła Biełaruskaja federacyja futbołu. U hety dzień projduć pieršyja matčy čverćfinału Kubku Biełarusi. Pieršy tur čempijanatu ŭ vyšejšaj lizie zaplanavany na 16—17 krasavika. Zaznačym, što sioleta start biaruć nie šasnaccać, jak u 2004 h., a čatyrnaccać kamandaŭ. Mienskaje «Tarpeda-SKA» i «Viedryč-97» nie paciahnuli lamki vyšejšaj lihi praź finansavuju nendzu.
Polski «Oskar»
U paniadziełak 6 sakavika ŭ Polskim teatry ŭ Varšavie budzie ŭručana premija «Futbolny «Oskar»-2004». Uznaharoda, zasnavanaja televizijnaj stancyjaj «Kanał+» i Polskim futbolnym sajuzam, budzie ŭručacca ŭ 12 katehoryjach: najlepšy hulec, adkryćcio hodu, hoł, sudździa, najlepšy hałkiper, abaronca, paŭabaronca, forvard, trener, prezydent klubu, najlepšy žurnalist-hazetčyk, najlepšy spartovy kamentatar hodu. Samy pačesny tytuł — futbalist hodu. Za jaho buduć zmahacca Tomaš Frankoŭski i Maciej Žuraŭski z krakaŭskaj «Visły», hulcy jakoj majuć najbolšuju kolkaść naminacyj, a taksama Jacak Kšynuvek ź leverkuzenskaha «Bajeru». U Internecie Kšynuvek pa-za kankurencyjaj: za jaho kandydaturu prahałasavali 78 adsotkaŭ naviednikaŭ sajtu «Hazety vyborčaj».
Kutuzaŭ začapiŭsia za pjedestał
Atrymaŭšy pieramohu ŭ haściavym matčy nad «Brešyjaj», «Sampdoryja» forvarda biełaruskaj zbornaj Vitala Kutuzava padniałasia na treciaje miesca ŭ italjanskim futbolnym čempijanacie. Hienueski klub paśla 26 turaŭ maje 44 punkty. Dahnać duet lideraŭ — «Milan» i «Juventus», što za dvanaccać turaŭ da finišu vyrvaŭsia napierad na 13 punktaŭ, — užo niemahčyma. Tut by treciaje miesca zachavać, na jakoje taksama pakłali voka «Inter», «Palerma» dy «Ŭdyneze». Bronzavyja medali, aproč hrašovaha i maralnaha zadavalnieńnia, daduć mahčymaść «Sampdoryi» pasprabavać uvosień svaje siły ŭ Lizie čempijonaŭ.
Na Brašaŭ
Z 4 pa 6 sakavika ŭ Brašavie projdzie tenisny matč 1/8 finału Kubku Devisa pamiž zbornymi Rumynii i Biełarusi. Asnoŭnyja nadziei biełarusaŭ uskładajucca na Maksima Mirnaha i Ŭładzimiera Vałčkova, druhimi numarami ŭ Brašaŭ adpravilisia junyja Jahor Puntus, Alaksandar Bury dy Alaksiej Biassonaŭ. Kapitan kamandy — Andrej Biassonaŭ.
U paniadziełak vyznačylisia sa składam rumyny. U adzinočnym razradzie zhulajuć Andrej Paveł i Viktar Chanesku, a parnym — Paveł i Razvan Sabaŭ. U piatnicu hulnia pačniecca a 13-j pa-biełaruskim časie, u subotu — a 15-j, u niadzielu — a 13-j. ANT abiacaje pakazać usie matčy ŭ žyvym etery.
Pieramožca zhulaje ŭ čverćfinale ź pieramožcam pary ZŠA—Charvatyja.
Super-Maryjo sychodzić
Najvialikšy chakieist XX stahodździa i ŭładalnik «Pitsburh Pinhvinz» Maryjo Lemjo, chutčej za ŭsio, nia budzie brać udziełu ŭ čempijanacie śvietu-2005, što projdzie ŭ Vienie i Insbruku z 30 krasavika pa 15 traŭnia. Lemjo śćviardžaje, što nia maje aptymalnaj formy, tym bolš, što sioleta praz łakaŭt u Nacyjanalnaj chakiejnaj lizie nie zhulaŭ nivodnaha matču. «Nia dumaju, što dla mianie ci zbornaj Kanady budzie dobra, kali ŭ hetaj zbornaj budzie vystupać chakieist, što nie hulaŭ ceły hod. Ja pačuvajusia mienavita tak. Moža, ja jašče pamianiaju rašeńnie, ale pakazać dastojny chakiej nia zdoleju», — kaža superlehienda suśvietnaha chakieju.
AR, gazeta.pl/sport, nhl.com, daviscup.org
Kamientary