Ukrainskija tavary šyrej pranikajuć u Biełaruś. Kirmaš u Chmialnickim całkam zamianiŭ varšaŭski stadyjon. Aŭtobusnyja parki pavialičvajuć kolkaść rejsaŭ u hety ŭkrainski horad, adkul biełarusy ciahnuć tannyja rečy. Ź biadotnaj susiedki (havoračy słovami BT) — u kvitniejučuju Biełaruś. Naziraje Rusłan Raviaka.
Razam z tymi rečami traplaje da nas i ŭkrainskaja mova. Nadpisy pa-ŭkrainsku majucca na ŭsich tavarach, abhortkach i pakunkach. Pradprymalniki ŭžo volna čytajuć na joj, vielmi chutka vyvučyŭšy jaje biez prymusu — darečy, jak niekali j polskuju. Pradaviec lohka čytaje i tłumačyć pakupniku kampanenty parfumy, sposaby ŭžyvańnia šampuniu. Nikoha nia ździviš ukrainskimi nadpisami na tureckich, kitajskich praduktach.
Zakony Ŭkrainy prymusili ŭkrainizavacca nia tolki zachodnich vytvorcaŭ, ale i rasiejcaŭ. Darma što na rasiejskich kanałach plavuzhajuć pra zabaronu vyvučeńnia rasiejskaj movy ŭ Kijevie, amal na ŭsich tavarach rasiejskaha pachodžańnia jość ukrainskija nadpisy. Hrošy j kapitał pieramahajuć palityku. A mahčyma, palityka zapluščvaje vočy na biznes, žyviačysia z tych samych srodkaŭ ad prodažaŭ va Ŭkrainie.
Biełaruskija firmy taksama chutčej ukrainizujucca, čym biełarusizujucca. Prykład — pinskija zapałki, na pušačkach jakich źmieščana nalepka całkam na ŭkrainskaj movie. Našy maroziva, čypsy, šakalad majuć na abhortkach rasiejskija i ŭkrainskija teksty. Niekatoryja firmy (zbolšaha biełaruskija, a nie rasiejskija) dapisalisia da taho, pierad rasiejskim nadpisam staviać dva značka: RUS, BY. Niedzie nižej iduć nadpisy pa-ŭkrainsku, polsku, česku, słavacku.
Zabyŭšysia na biełaruskuju movu, našy vytvorcy vielmi chutka asvoili moŭnaje zakanadaŭstva susiedniaj krainy. Ukrainizacyja paśpiachova realizujecca na pradpryjemstvach Homielu i Bieraścia. Zychodziačy z hetaha, vidavočna, što biełarusizacyja pojdzie šparkim krokam, jak tolki dziaržava pačnie nadavać hetamu peŭnuju ŭvahu. Pakul, na žal, u nas adbyvajecca advarotnaje…
Jak heta ni paradaksalna, ukrainizacyja maje stanoŭčyja vyniki dla Biełarusi. Vytvorcy rasiejskaha soku «Maja siamja» ci makarony «Šabiekinskaj», zychodziačy z ukrainskaha vopytu, pierakłali adrazu i na biełaruskuju movu svaje nadpisy na ŭpakoŭcy. Rasiejskija firmy, kab nie duryć sabie hałavy biełaruskim zakanadaŭstvam, lahična miarkuć, što kali jość niezaležnaja dziaržava, dyk i rodnaja mova tamaka maje lepšaje stanovišča. Pamylajucca rasiejcy. Dziakuj za heta ŭkraincam.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju6
Kamientary