«Značna bolš, čym zvyčajna». U Estonii zatrymali 32 mihrantaŭ, jakija prybyli praź Biełaruś i Łatviju
Palicyja Estonii za apošnija try dni zatrymała 32 inšaziemcaŭ, źviazanych ź mihracyjnym patokam ź Biełarusi na łatvijskaj miažy. Zatrymańni prajšli ŭ roznych rajonach Talina — u punkcie raźmiaščeńnia ŭ rajonie Nyme, u porcie i ŭ centry horada. Pry zatrymańni adnoj z hrup pravaachoŭnikam dapamahła infarmacyja ad žychara Charjumaa, piša reform.news.
U zatrymanych nie było dakumientaŭ, jakija dazvalajuć ustanavić asobu, paviedamili ŭ pres-słužbie palicyi. Pavodle papiarednich danych, jany źjaŭlajucca hramadzianami roznych krain Afryki.
Papiarednie, jany prybyli ŭ Estoniju praź Biełaruś i Łatviju. Pavodle ich słoŭ, zatym jany płanavali pierabracca praź Finlandyju ŭ krainy Zachodniaj Jeŭropy.
«Za apošnija try dni kolkaść zatrymanych za niezakonnaje pierasiačeńnie miažy značna vyšejšaja za zvyčajnuju. U vypadku z takimi ludźmi pieršačarhovaja zadača palicyi — vyśvietlić realnaje pachodžańnie hetych mihrantaŭ i ich namiery ŭ Šenhienskaj zonie, kab zabiaśpiečyć hramadski paradak i biaśpieku ŭ Estonii i va ŭsioj Šenhienskaj zonie», — zajaviŭ kiraŭnik biuro pahraničnaj słužby Pychjaskaj prefiektury Indrek Aru.
Aru zajaviŭ, što niezakonnaja mihracyja praź Biełaruś u kirunku Łatvii nosić arhanizavany charaktar i vykarystoŭvajecca jak instrumient hibrydnaha ŭździejańnia. Pavodle jaho słoŭ, uzmacnieńnie kantrolu ŭ Polščy, Litvie i Łatvii taksama mahło paŭpłyvać na pavieličeńnie kolkaści sprob ujezdu ŭ Estoniju.
«Nielehalnaj mihracyi taksama spryjaje letniaje nadvorje, jakoje palahčaje pierasoŭvańnie. Kali vy zaŭvažycie niezvyčajnyja hrupy inšaziemcaŭ u pryhraničnych rajonach, asabliva na poŭdni Estonii, jakija adroźnivajucca ad tak zvanych zvyčajnych turystaŭ, abo dziejańni, jakija ŭkazvajuć na niezakonny handal ludźmi, varta paviedamić pra heta ŭ palicyju. Razumnaja pilnaść dapamoža nam chutčej reahavać i prajaśnić situacyju», — zaklikaŭ jon.
Palicyja Estonii paviedamiła, što źmianiła taktyku pracy ŭ transpartnych vuzłach i ŭ pamiežnych rajonach z ulikam rostu mihracyjnaha cisku. Akramia taho, estonskija pravaachoŭniki dapamahajuć łatvijskim kaleham, jakija niepasredna sutykajucca z pavieličeńniem kolkaści nielehalnych pierachodaŭ.
Bolšaść zatrymanych užo prajšli pieršasnyja pracedury, i značnaja častka ź ich padała zajavy na mižnarodnuju abaronu ŭ Estonii. Pavodle rašeńnia sudu inšaziemcy źmieščanyja ŭ centr utrymańnia. Razhlad zajaŭ zvyčajna zajmaje da 4 miesiacaŭ, ale ŭ asobnych vypadkach termin moža być padoŭžany jašče na 2 miesiacy.
U vypadku admovy ŭ vydačy abarony inšaziemcy buduć vydvaranyja z Estonii.
Za pieršyja 6 miesiacaŭ 2026 hoda ŭ Estonii byli zatrymanyja 149 čałaviek za niezakonnuju mihracyju.
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca10
Kamientary