Лявон Баршчэўскі заклікае ўсе адгалінаванні былога Народнага Фронту аб'яднацца
Ён гатовы выступіць старшынёй на аб'яднаўчым з'ездзе БНФ як шырокага руху, і пры гэтым не займаць пасля ніякіх пасад.
Былы старшыня Партыі БНФ Лявон Баршчэўскі заклікае ўсе адгалінаванні партыі аб'яднацца.
Пра гэта ён заявіў 18 кастрычніка падчас анлайну на «Радыё Свабода».
Баршчэўскі адзначыў, што ў 1999 годзе «галоўнай паразай Фронту ў выніку была не фармальная параза, што стварылася дзве арганізацыі», а тое, што большасць людзей з мінскай арганізацыі Партыі БНФ, якая была «лідарам у Народным Фронце, якая забяспечвала масавасць акцый, іх адпаведны ўплыў на грамадства», «не пайшла ні ў адну структуру (фармальна нават застаўшыся ў гэтай структуры)».
Пасля гэтага, адзначыў Баршчэўскі «БНФ перасталі баяцца». Баршчэўскі «абсалютна ўпэўнены, што як рух БНФ сябе не вычарпаў».
«Дзейнасць партыі ў недэмакратычнай дзяржаве пераўтвараецца ў прынцыпе ў фікцыю, таму што партыя падкантрольная: там улічанае сяброўства, туды можна ўвапхнуць куды хочаш і колькі хочаш людзей.
А вось шырокі рух з тымі мэтамі, якія былі сфармуляваныя яшчэ 25 гадоў таму, цалкам актуальны», — лічыць ён. Баршчэўскі гатовы выступіць старшынёй на аб'яднаўчым з'ездзе БНФ як шырокага руху, і пры гэтым не займаць пасля ніякіх пасад.
«Цалкам лагічна не адмаўляцца ад пераемнасці з тым БНФ, таму што БНФ усё-такі па вялікім рахунку зрабіў значна больш добрага для людзей, чым кепскага.
Дзякуючы БНФ не загінуў ніводзін чалавек у Беларусі (падчас масавых дэманстрацый, нягледзячы на ўсе правакацыі, на ўсё, што спрабаваў вырабляць рэжым).
Гэта капітал, і ад гэтага капіталу адмаўляцца нельга, але каб дамовіцца з гэтым капіталам… І я заклікаю ўсе адгалінаванні, хто сябе сапраўды лічыць БНФ-аўцам, аб'яднацца», — заявіў ён.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм11
Каментары