Празрыстыя сандалі, шлапакі ды туфлі з мяккага пластыку, якія былі папулярныя ў 1990-я, зноў вярнуліся ў модныя калекцыі. Цяпер іх выпускаюць як масавыя брэнды, так і вядучыя модныя дамы, прапаноўваючы новыя формы і колеры.
Празрысты абутак з эластычнага пластыку, вядомы пад англійскай назвай jelly shoes, стаў адным з прыкметных трэндаў сезона. Як піша Rzeczpospolita.pl, калі трыццаць гадоў таму яны асацыяваліся перадусім з дзіцячым і моладзевым гардэробам, то сёння дызайнеры прапануюць іх у самых розных варыянтах — ад спартыўных мадэляў да элегантных туфляў на абцасах.
Гісторыя гэтага абутку пачалася яшчэ пры канцы 1970-х, калі бразільскі брэнд Melissa выпусціў першыя мадэлі з гнуткага пластыку. Аднак сапраўдную папулярнасць яны набылі ў 1990-я, калі сталі адным з сімвалаў летняй моды.
Новая хваля цікавасці да jelly shoes пачалася ў 2024 годзе пасля таго, як вялікую ўвагу прыцягнулі пластыкавыя шлёпанцы амерыканскага брэнда The Row. У наступным годзе празрысты абутак з'явіўся ў калекцыях Skims, Giambattista Valli, Chloé і Puma, якая выпусціла мадэль у супрацоўніцтве з брэндам Fenty спявачкі Рыяны.
Сёлета падобныя мадэлі прапануюць як масавыя брэнды H&M, Marks & Spencer і COS, так і люксавыя модныя дамы. Празрыстыя басаножкі, туфлі і в'етнамкі таксама можна ўбачыць у гардэробах знакамітасцяў, сярод якіх актрысы Зоі Кравіц, Джэніфер Лоўрэнс і Брук Шылдс.
Дызайнеры не абмяжоўваюцца класічнымі басаножкамі. У новых калекцыях з'явіліся платформы, туфлі на невысокіх абцасах, мадэлі з высокай халявай і больш спартыўныя варыянты.
Сам брэнд Melissa, з якога пачалася гісторыя гэтага абутку, сёлета прадставіў сумесныя калекцыі з Ganni і Diesel. Jimmy Choo і Loewe зрабілі стаўку на мадэлі з невысокімі абцасамі, Chloé паказаў празрыстыя туфлі з раменьчыкамі, а Valentino Garavani — басаножкі, якія нагадваюць карункі.
Да трэнду далучыўся і Nike, абнавіўшы мадэль Rejuven8 Run, упершыню прадстаўленую ў 2008 годзе. Яна атрымала празрысты пластыкавы каркас і здымны ўнутраны «шкарпэткападобны» элемент з сеткі.
Празрысты пластыкавы абутак з'яўляецца і ў мужчынскіх калекцыях. Напрыклад, на паказе Saint Laurent сезона вясна—лета 2027 дызайнер Энтані Вакарэла прадставіў мужчынскія туфлі з напаўпразрыстага матэрыялу, якія сталі адной з самых абмяркоўваемых дэталяў калекцыі.
Разам з папулярнасцю такога абутку зноў узніклі і пытанні пра яго практычнасць. Празрысты пластык можа націраць ногі, а асноўны матэрыял, полівінілхларыд (ПВХ), нярэдка крытыкуюць праз яго ўплыў на навакольнае асяроддзе. Тым не менш гэта не перашкодзіла вяртанню трэнду ў калекцыі многіх вытворцаў.
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла17
Каментары