У Львове прапануюць назваць вуліцу імем беларуса, забітага на барыкадах у Кіеве
Львоўская «Свабода» прапанавала прысвоіць званне «Ганаровы грамадзянін горада» пяці загінулым удзельнікам сутычак у Кіеве і выплаціць матэрыяльную дапамогу іх сем’ям у памеры 5000 еўра.
Як піша сайт ВА «Свабода», Львоўскай гарадской радзе прапануецца прысвоіць званне «Ганаровы грамадзянін горада» пяці загінулым — Сяргею Нігаяну, беларусу Міхаілу Жызнеўскаму, львавяніну Юрыю Вярбіцкаму і яшчэ двум неапазнаным асобам — і ўстанавіць матэрыяльную дапамогу ў памеры 50 000 грн сем’ям загінулых.
Гэтую прапанову ад імя 55 дэпутатаў агучыў намеснік кіраўніка фракцыі «Свабода» ў Львоўскай гарадской радзе Любамір Мельнічук.
Паколькі «Свабода» мае бальшыню ў мясцовай Радзе, а большасьць дэпутатаў цяпер знаходзяцца ў Кіеве, Мельнічук прапанаваў супольнасці горада прагаласаваць за прапанаваны праект рашэння.
«Супольнасць горада аднадушна ў сваім імкненні годна ўшанаваць памяць загінулых герояў і матэрыяльна падтрымаць іх сем’і. Такім чынам, наш наступны крок — мы перадаём рашэнне на выкананне мэру Львова Андрэю Садоваму», — адзначыў Любамір Мельнічук.
Каментары