У Мінску прадалі паўпакоя ў трохпакаёўцы і амаль 11 «квадратаў» у камуналцы. Што за здзелкі?
На сталічных аўкцыёнах усё часцей з’яўляюцца незвычайныя лоты — не цэлыя кватэры, а долі ў іх. Нягледзячы на юрыдычныя складанасці, попыт на такія метры расце, а кошты падчас таргоў істотна павялічваюцца, піша Onliner.
Вясной 2025-га, напрыклад, з аўкцыёну выкупілі 1/4 кватэры па вуліцы Ванеева, 10 (Партызанскі раён).
Таргі за метры ў трохпакаёўцы агульнай плошчай 61,1 «квадрата» ў доме, пабудаваным у 1966 годзе, былі не першымі. Стартавая цана, ужо зніжаная за час папярэдніх спроб продажу на 40%, раўнялася 16 020 рублям ($5440 у эквіваленце). Крок таргоў складаў 5%, або 801 рубель.
Пераможца выкупіў лот за 22 428 рублёў ($7616 па курсе).
Намінальна новы ўласнік набыў 1/4 кватэры, гэта значыць крыху больш за 15 «квадратаў». Астатнія метры ў кватэры належаць дзяржаве (63/100 долі), а таксама іншаму ўласніку (12/100 доляў).
Аднак жылая плошча трохпакаёўкі па тэхпашпарце пазначана так: пакой на 11,5 «квадрата» і два пакоі па 17,2 «квадрата». Як у гэтых пакоях знайсці свае 15 квадратных метраў?
Праблема ў тым, што яны «разбрасаныя» па ўсёй плошчы трохпакаёўкі: не толькі жылой, але і агульнай. Іншымі словамі, набываючы чвэрць у трохпакаёўцы, пакупнік атрымаў, умоўна кажучы, паўпакоя і патрошкі «квадратаў» ад іншых памяшканняў: кухні, калідора, санвузла.
Чаму так? У гэтай трохпакаёўкі ёсць вялікі мінус: у кватэры долі не адасобленыя як пакоі. Гэта значыць, што ў кожнага ўладальніка ёсць доля ў агульнай уласнасці. Вызначаць, якая канкрэтна частка нерухомасці каму належыць, павінны самі гаспадары.
Дарэчы, пакупнік унёс арганізатару аўкцыёну яшчэ і 9% ад выніковай сумы лота як узнагароду за правядзенне таргоў, гэта значыць яшчэ 2018 рублёў ($685 у эквіваленце). У выніку 15 «квадратаў» з хвосцікам, вызначыць тэрытарыяльнае знаходжанне якіх у трохпакаёўцы складана, абышліся новаму ўладальніку ў $8301.
У кастрычніку гэтага года знайшоўся пакупнік і на 7/50 доляў у шасціпакаёвай камуналцы Мінска па вуліцы Пухавіцкая, 5 (Кастрычніцкі раён). Агульны метраж класічнай камунальнай кватэры — 103 «квадраты».
З аўкцыёну сышла яе частка — пакой у 10,84 квадратных метра, які належаў уласніку, што не плаціў за ЖКП.
Пераможца заплаціў за пакой 34812 рублёў (амаль $12 тысяч у эквіваленце), а таксама 9% ад гэтай сумы (1300 рублёў, або $1075 па курсе) арганізатарам аўкцыёну.
Каментары