Прэзідэнт Украіны Віктар Януковіч звольніў Андрэя Клюева з пасады сакратара Рады нацыянальнай бяспекі і абароны (РНБА) Украіны і прызначыў яго кіраўніком Адміністрацыі прэзідэнта, паведамляе УНІАН.
Андрэй Клюеў нарадзіўся ў 1964 г. у Данецку, тройчы займаў пасаду віцэ-прэм'ера (2003, 2006, 2010). Народны дэпутат Украіны IV—VI скліканняў. З 14 лютага 2012 быў сакратаром РНБА.
Клюеў — сябра Партыі Рэгіёнаў, 1-ы намеснік старшыні партыі (2001—2003), намеснік кіраўніка партыі з 2008 года.
Клюеў лічыцца прыхільнікам жорсткай лініі. Ён належыць да данецкай бізнэс-групоўкі.
Цяпер выхадцы з Данецка займаюць усе найвышэйшыя пасады ва Украіне: прэзідэнта, прэм'ера (Азараў), спікера Вярхоўнай Рады (Рыбак) і кіраўніка Адміністрацыі прэзідэнта.
Данецк — галоўны горад Данецкай вобласці, цэнтра Данбаса. Да го належаць яшчэ Луганская вобласць. Гэта апірышча Партыі рэгіёнаў. Там Януковіч набраў каля 90% галасоў. Януковіча таксама падтрымліваюць Крым, Харкаў, Запарожжа, Адэса, Херсон, дзе Януковіч атрымліваў 60—80% галасоў. Кіеў, Палтава, Чаркасы, Вінніца, Хмяльніцкі, як і Захад Украіны ў аналагічных прапорцыях падтрымліваюць апазіцыю.
Каментары