Суд асудзіў праваабаронца і юрыста Інтыгама Аліева да 7,5 гадоў турмы, паведамляе haqqin.az.
Пасяджэнне прайшло пад старшынствам суддзі Расіма Садыхава.
У сваім апошнім слове абвінавачаны сказаў: «Пракурор запатрабаваў асудзіць мяне на 10 гадоў. Якім будзе рашэнне суда, я не ведаю. Можа, восем, а можа, і ўсе дзесяць гадоў. Я нікога не вінавачу, але жадаю вам усім жыць у дэмакратычным грамадстве, дзе паважаюць правы чалавека. Арыштаваны я быў за сваю палітычную дзейнасць», — сказаў ён.
Аліеў абвінавачваўся па артыкулах 213.1 (ухіленне ад выплаты падаткаў), 308.2 (злоўжыванне службовымі паўнамоцтвамі, што пацягнула цяжкія наступствы), 192.2 (незаконнае прадпрымальніцтва) і 179.3.2 (прысваенне або растрата) КК Азербайджана.
Аліеў быў тым юрыстам, які дапамог сотням грамадзян Азербайджана падаць пазовы ў еўрапейскія суды са скаргамі на парушэнні іх правоў ці незаконнае зняволенне.
Праваабаронцы называюць абвінавачванні супраць Інтыгама Аліева фальшывымі і надуманымі.
Усяго за апошні год у Азербайджане арыштаваныя дзясяткі вядомых праваабаронцаў, блогераў і дзеячоў апазіцыі.
Каментары