Амерыканскага блогера Джарэда Шульта аштрафавалі на 230 даляраў за тое, што ён дакрануўся да сурка ў нацыянальным парку Маўнт-Рэйнір у штаце Вашынгтон, паведамляе выданне SFGATE.
23‑гадовы Шульт, які жыве ў Тэхасе і мае каля 171 тысячы падпісчыкаў у інстаграме, у пачатку жніўня падчас паходу па папулярным маршруце Skyline Trail убачыў сурка. Жывёліна сама падышла да блогера і прыціснулася да яго нагі, пасля чаго мужчына пачухаў яе па спіне. Ягоны сябар зняў гэта на відэа, а пазней Шульт апублікаваў ролік у сацсетках.
Пасля публікацыі частка карыстальнікаў раскрытыкавала блогера за занадта блізкі кантакт з дзікай жывёлінай. Неўзабаве ў каментарах з'явілася папярэджанне ад чалавека, які прадставіўся супрацоўнікам парку і паведаміў, што з Шультам звяжуцца рэйнджары.
На наступны дзень блогеру патэлефанавалі з нумара штата Вашынгтон. Ён не адказаў на незнаёмы званок, пасля чаго рэйнджар патэлефанаваў ягоным бацькам і паведаміў ім пра будучы штраф. Пазней Шульт усё ж пагаварыў з супрацоўнікам парку і папрасіў прабачэння.
За парушэнне федэральных правіл яму выпісалі штраф у 230 даляраў. Прытым спачатку рэйнджар казаў, што за такое парушэнне можа пагражаць штраф да 5 тысяч даляраў і да шасці месяцаў зняволення.
Правілы нацыянальнага парку Маўнт-Рэйнір забараняюць наведвальнікам карміць і дакранацца да дзікіх жывёл, у тым ліку суркоў, бурундукоў і суслікаў. Таксама ад жывёл неабходна трымацца на адлегласці не меншай за 50 ярдаў — больш за 45 метраў.
Шульт прызнаў, што парушыў правілы, але палічыў дзеянні рэйнджараў адносна кантакту з ім і ягонымі бацькамі безадказнымі. Пры гэтым блогер заявіў, што да гэтага проста не задумваўся пра забарону, бо бачыў іншых людзей побач з дзікімі жывёламі.
Ён таксама прызнаўся, што дагэтуль не ведае, адкуль супрацоўнікі парку атрымалі ягоны нумар тэлефона і кантакты ягоных бацькоў.
Хто з палітвязняў выйшаў на свабоду 16 верасня ПОЎНЫ СПІС23
Каментары