У выніку суд адкладзены.
Суд над актывістам кампаніі "За свабоднае развіццё прадпрымальніцтва", жыхаром горада Узда Віктарам Крывалём перанесены на 27 лютага. Такое рашэнне прыняў 11 лютага Мінскі раённы суд.
Як паведаміў БелаПАН В.Крываль, ён абвінавачваецца ў "непадпарадкаванні законным патрабаванням работнікаў міліцыі". Размова ідзе аб падзеях 10 студзеня, калі В.Крываль і яшчэ адзін актывіст кампаніі Аляксандр Цацура разам з жонкай Тамарай і сынам Ільёй былі спынены на аўтатрасе Мінск — Слуцк каля Самахвалавічаў. Прадпрымальнікі накіроўваліся ў Мінск, где ў гэты дзень праходзіла акцыя пратэсту прадпрымальнікаў. Мікрааўтобус, які належыць А.Цацуру, спынілі работнікі ДАІ. У прадпрымальніка забралі правы, абвінаваціўшы ў парушэнні правілаў дарожнага руху, і не дазволілі ехаць далей. Калі ўсе чацвёра накіраваліся ў Мінск пешшу, іх затрымалі і даставілі ў РУУС Мінскага раёна, дзе склалі пратаколы.
"У пратаколе напісалі, што мы аказалі непадпарадкаванне законным патрабаванням супрацоўнікаў міліцыі, хапалі за форменнае адзенне, вырываліся і спрабавалі ўцячы. Падкрэслю, што ў нашым затрыманні бралі ўдзел 14 міліцыянераў: шэсць работнікаў дарожна-патрульнай службы і восем — патрульна-паставой службы, узброеных дубінкамі і пісталетамі", — паведаміў В.Крываль. Пратрымаўшы ў аддзяленні міліцыі сем гадзін, іх адпусцілі, а праз два тыдні ўсім чатыром прыслалі позвы ў суд.
Сёння ў судзе В.Крываль запатрабаваў, каб пасяджэнне вялося на беларускай мове. "Суддзя адхіліў маё хадайніцтва. У сваю чаргу я заявіў, што адмаўляюся адказваць на пытанні, якія задаюцца мне на рускай мове", — паведаміў прадпрымальнік. Пасля гэтага суддзя заявіў аб пераносе працэсу на 27 лютага з-за няяўкі сведак. У якасці сведак павінны былі выступаць А.Цацура, яго жонка і сын. "Сам Аляксандр сядзіць у следчым ізалятары, а жонка і сын захварэлі", — зазначыў В.Крываль.
Як раней паведамляў БелаПАН, А.Цацуру і былога намесніка старшыні Беларускай жаночай партыі "Надзея" Ларысу Насановіч 29 студзеня раённы суд Салігорска прыгаварыў да 15 сутак арышту за ўдзел у несанкцыянаваным сходзе ў Салігорску 28 студзеня.
Цяпер чытаюць
Сям’ю з дзіцём не пусцілі есці ўнутры кавярні піцу навынас. «Гараж» апраўдваецца, інтэрнэт спрачаецца6
Сям’ю з дзіцём не пусцілі есці ўнутры кавярні піцу навынас. «Гараж» апраўдваецца, інтэрнэт спрачаецца
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца1212
Каментары