З 22 сакавіка да 12 красавіка ў Кіеве фэстываль незалежнай культуры.
З 22 сакавіка да 12 красавіка ў Кіеве будзе праходзіць фэстываль сучаснай беларускай культуры «Беларуская вясна». Фэстываль адбудзецца у другі раз, і сёлета будзе ўключаць вулічны пэрформанс, кінапаказы (у тым ліку прэм’ерныя), вечар беларускай флэш‑анімацыі, выставу фатаздымкаў і СМІ Беларусі, круглы стол мэдыя‑мэнэджэраў, канцэрт этна‑гуртоў і ўкраінска‑беларускую літаратурную вечарыну.
«Нягледзячы на тое, што беларусы ёсьць найбольш роднасным да ўкраінцаў народам, нам амаль нічога не вядома пра беларускую культуру», — кажа каардынатар фэстывалю Аляксандар Дземчанка (Олександр Демченко).
Лягатыпам фэстывалю стаў падводны човен колераў нацыянальнага сьцягу Беларусі — белы, чырвоны й белы. Гэты вобраз пазычаны зь песьні гурту NRM, легенды беларускага року. Арганізатары надаюць яму асаблівае значэньне, бо «Беларуская вясна 2008» — гэта паглыбленьне ў неспазнаныя глыбіні беларускай культуры, якая схаваная пад тоўстым слоем клішэ ды стэрэатыпаў.
Гасьцямі фэстывалю стануць кінарэжысэр Антось Цялежнікаў, сцэнарыст Аляксандар Качан, мультыплікатарка й прадусарка Вольга Кузьміч, этна‑гурты Джамбібум і Нагуаль, а таксама беларускія пісьменьнікі, журналісты й выдаўцы, сярод якіх Андрэй Хадановіч, Андрэй Скурко, Уладзімер Арлоў, Марыя Мартысевіч, Вера Бурлак і іншыя.
З падрабязнай праграмай можна пазнаёміцца на сайце фэстывалю
Цяпер чытаюць
«Я еду натхніцца ўкраінцамі». Святлана Ціханоўская пачала афіцыйны візіт ва Украіну20
Каментары