49-гадовая Таццяна Шаўчэнкава адпрацавала 7,5 года у Цэнтры сацыяльнага абслугоўвання насельніцтва. Перад прэзідэнцкімі выбарамі жанчына запісалася ў незалежныя назіральнікі кампаніі «Права выбару» — і гэта паставіла кропку ў яе працы на пасадзе сацыяльнага работніка.
«Заробак у мяне быў вельмі малы — 2,5 мільёна. Да таго ж я адна гадую дзіця. Матэрыяльна мне вельмі цяжка. А назіранне — нічога ж супрацьзаконнага ў гэтым няма», — тлумачыць Шаўчэнкава.
Аднак такі ўчынак вельмі не спадабаўся кіраўніцтву барысаўскага Цэнтра сацыяльнага абслугоўвання. Таццяну выклікалі да дырэктара і прапанавалі звольніцца па пагадненні бакоў.
«Прапанова была зроблена такім тонам, што было зразумела: калі не звольнюся, то потым будзе горш. Не напісала б я тую заяву, знайшлі б за што звольніць пасля. Дырэктарка сказала мне: «Вось ідзіце цяпер да іх, хай яны вас і кормяць». Але такой рэакцыі я не чакала, канечне. Я ведала, ў якой краіне жыву, але што будзе нешта такое… Я не думала. Была проста ў шоку, калі ўсё гэта здарылася», — кажа Шаўчэнкава.
На сённяшні дзень Таццяна яшчэ не знайшла работы. У Барысаве сёння гэта ўвогуле няпроста — горад не вялікі. Да таго ж, па словах Шаўчэнкавай, Вольга Капыток, дырэктарка, запэўніла, што цяпер ў дзяржструктуры шлях для Таццяны закрыты.
«Я зараз у падвешаным стане. Калі шчыра, то і каментаваць штосьці баюся. Усё ж у мяне дзіця…», — прызнаецца Шаўчэнкава.
Дырэктарка Цэнтра Вольга Капыток ад каментараў адмовілася.
«А на якой падставе я павінна даваць вам інфармацыю? Калі Таццяна вам штосьці і сказала, то я ніякай інфармацыі не дам», — сказала Капыток.
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў69
Каментары