Стала вядома, чые парэшткі знайшлі беларускія турысты ў гарах Казахстана
Раней паведамлялася, што беларускія альпіністы ў гарах Казахстана знайшлі чалавечыя парэшткі. Верагодна, яны належаць мужчыну, які знік без вестак ажно 19 гадоў таму.
16 жніўня група беларускіх скалалазаў завяршыла двухтыднёвае ўзыходжанне ў Талгарскім раёне Алмацінскай вобласці Казахстана. Падчас спуску, на вышыні каля 3400 метраў, дзе пасля раставання ледніка адкрыўся раней недаступны ўчастак, турысты знайшлі чалавечыя парэшткі і асабістыя рэчы. Пра знаходку яны паведамілі ратавальнікам і апублікавалі ў сетцы фатаграфіі.
Гэтыя кадры ўбачыла 44‑гадовая Нэлі Міхеева. Яна звязалася з ратавальнікамі і паведаміла, што знойдзеныя рэчы могуць належаць яе бацьку. Падчас агляду на месцы сапраўды знайшлі пашпарт на імя Сяргея Міхеева. На момант знікнення мужчыну было 49 гадоў.
Сяргей Міхееў перастаў выходзіць на сувязь у 2007 годзе падчас горнага паходу. З таго часу яго лёс заставаўся невядомым. Цяпер ратавальнікі арганізавалі эвакуацыю парэшткаў з гор. Аднак афіцыйна асобу загінулага пакуль не пацвердзілі. Канчаткова ўстанавіць яе павінна ДНК-экспертыза, і толькі пасля гэтага цела змогуць перадаць сям'і.
Дачка расказала, што яе бацька вельмі любіў горны турызм. Аднак пасля цяжкай аперацыі на пазваночніку яму аформілі інваліднасць і забаранілі падымаць больш за пяць кілаграмаў. Здавалася, што гэта павінна было паставіць кропку ў яго захапленні гарамі.
Але Міхееў не адмовіўся ад свайго хобі. Ён пачаў рэгулярна трэніравацца, кінуў курыць і паступова аднавіў фізічную форму. Праз некаторы час інваліднасць з яго знялі. Пасля выздараўлення мужчына перш за ўсё зноў адправіўся ў горы. Менавіта падчас аднаго з такіх паходаў у 2007 годзе ён і знік без вестак.
Цяпер, праз 19 гадоў, выпадковая знаходка беларускіх турыстаў можа дапамагчы сям'і нарэшце даведацца, што адбылося з Сяргеем Міхеевым.
Беларускія турысты знайшлі ў гарах Казахстана чалавечыя парэшткі
Швейцарскі ледавік аддаў целы альпіністаў, якія загінулі 34 гады таму
Рыхтуюць пад'ём да месца магчымай гібелі беларускіх альпіністаў у Кыргызстане
Беларуска расказала, як у 66 гадоў пераадолела «гару-забойцу» Нанга-Парбат
Што вядома пра Максіма Палянскага і Мікалая Свірыдава — беларускіх альпіністаў, якія зніклі ў гарах Кыргызстана
У 2020 годзе ябацька Аміна «актыўна галасавала» за Лукашэнку. А цяпер не разумее, чаму родная маці на яе данесла, а міліцыя затрымала33
Каментары