Пракуратура Мінска распачала крымінальную справу ў дачыненні да супрацоўніка міліцыі за перавышэнне службовых паўнамоцтваў пры затрыманні педыятра Дзмітрыя Серады. Як паведаміў БелаПАН Серада, пра гэта вядома з ліста, які ён атрымаў са сталічнай пракуратуры.
Нашумелы інцыдэнт здарыўся 4 жніўня. Каля васьмі гадзін раніцы ў кватэру лекара ўварваліся невядомыя ў масках. Без званкоў і тлумачэнняў яны сталі выбіваць ўваходныя дзверы, а таксама спусціліся з даху і разбілі шкло балконных дзвярэй на кухні. Дзмітрый Серада беспаспяхова спрабаваў даведацца, што за людзі штурмуюць яго кватэру і чаму. Невядомыя ўварваліся ў кватэру, паклалі гаспадара тварам у падлогу, заламалі рукі за спіну і надзелі наручнікі. Толькі пасля гэтага цяжарнай жонцы Серады паведамілі, што яны з міліцыі, і адвялі жанчыну з дзіцём у іншы пакой.
Пазней высветлілася, што лекара падазравалі ў эксгібіцыянізме. Праз суткі Сераду вызвалілі, прызнаўшы яго недатычнасць, бо пацярпелая і сведка не апазналі ў ім злачынца. Сам Серада расказаў, што ў дзень злачынства, у якім яго абвінавачвалі, быў з сябрамі на рыбалцы за 80 км ад Мінска.
Па факце затрымання Серады Следчы камітэт правёў праверку, па выніках якой у распачынанні крымінальнай справы было адмоўлена, а цялесныя пашкоджанні, нанесеныя мужчыну, прызнаныя «несапраўднымі». Пасля паўторнай скаргі ў СК лекара ў распачынанні крымінальнай справы зноў было адмоўлена, і Дзмітрый Серада звярнуўся ў пракуратуру Мінска.
Адказ з пракуратуры датаваны 9 студзеня. У лісце паведамляецца, што па выніках разгляду скаргі рашэнне СК аб адмове ў распачынанні крымінальнай справы адмененае. У дачыненні да супрацоўніка Заводскага РУУС сталіцы распачатая справа па ч. 1 арт. 426 КК (наўмыснае ўчыненне службовай асобай дзеянняў, якія відавочна выходзяць за межы правоў і паўнамоцтваў, дадзеных ёй па службе, што пацягнула прычыненне шкоды ў буйным памеры або істотнай шкоды правам і законным інтарэсам грамадзян або дзяржаўным ці грамадскім інтарэсам (перавышэнне ўлады або службовых паўнамоцтваў)). Крымінальная справа накіраваная начальніку УСК па Мінску для арганізацыі папярэдняга расследавання.
Каментары