СК: Жанчына, якая павесілася ў Рагачове, пры жыцці не атрымлівала паведамлення аб падатку «на дармаедства»
Рагачоўскі раённы аддзел Следчага камітэта правёў праверку па факце смерці жыхаркі Рагачова 1962 года нараджэння, падчас якой не ўстанавіў даных, якія сведчаць пра давядзенне кім-небудзь жанчыны да самагубства. Пра гэта паведаміла афіцыйны прадстаўнік упраўлення СК па Гомельскай вобласці Марыя Крываногава.
Яна паведаміла, што 3 лістапада ўладальнік прыватнага дома знайшоў на верандзе ў павешаным стане без прыкмет жыцця сваю сястру. Пра гэта мужчына неадкладна паведаміў праваахоўнікам. Шэраг інтэрнэт-рэсурсаў напісалі, што яна пакончыла з сабой пасля атрымання ліста з падатковай з патрабаваннем аплаціць збор на фінансаванне дзяржаўных выдаткаў.
Падчас праверкі Рагачоўскім РАСК устаноўлена, што жанчына пражывала адна ў былой бацькоўскай хаце. Муж памерлай пайшоў з жыцця некалькі гадоў таму, дачка працуе ў Расійскай Федэрацыі, сын адбывае пакаранне ў месцах пазбаўлення волі.
Каля двух гадоў жыхарка райцэнтра нідзе не працавала, у аддзел занятасці насельніцтва ўпраўлення па працы, занятасцi i сацыяльнай абароне райвыканкама для рэгістрацыі ў якасці беспрацоўнага не звярталася.
Апытаныя сваякі і знаёмыя растлумачылі, што жанчына доўгі час злоўжывала спіртным, некалькі разоў кадзіравалася ад алкагольнай залежнасці, неаднаразова выказвала намер учыніць самагубства.
Згодна з заключэннем судова-медыцынскай экспертызы, смерць жанчыны наступіла ў выніку здушвання шыі пятлёй пры павешанні. У крыві памерлай знойдзены этылавы спірт у колькасці 2,3 праміле.
Рагачоўскім РАСК устаноўлена, што смерць жанчыны наступіла ў выніку самагубства. Прычынай суіцыду стаў дэпрэсіўны стан, абвостраны злоўжываннем спіртнымі напоямі.
Інфармацыя, размешчаная на адным з рэгіянальных інтэрнэт-рэсурсаў, аб тым, што сярод прычын самагубства жыхаркі Рагачова — атрыманне паведамлення з падатковых органаў, не адпавядае рэчаіснасці, заявілі следчыя. «Дакладна ўстаноўлена, што пры жыцці жанчына не атрымлівала паведамлення аб выплаце збору на фінансаванне дзяржаўных выдаткаў за 2015 год», — падкрэслівае УСК па Гомельскай вобласці.
Цяпер чытаюць
Побач з Лукашэнкам на хакеі з'явілася новая прыгажуня10
Каментары