Партыя БНФ шукае ў грамадства падтрымкі для ўтрымання офіса, паведамляе Радыё Рацыя.
З-за фінансавых цяжкасцей у шэрага дэмакратычных партый і арганізацый з’явіліся праблемы з утрыманнем офісаў. Так, Рух «За свабоду» не здолеў працягнуць арэнду свайго офіса і пакуль працуе без памяшкання. У мінскай сядзібе Партыі БНФ з-за камунальных запазычанасцяў адключанае святло. Кіраўніцтва партыі вырашыла часова закрыць офіс да выплаты пазыкаў, папярэдне — з 6 па 10 чэрвеня.
Па словах кіраўніка Партыі БНФ Аляксея Янукевіча, да складанай сітуацыі прывёў шэраг прычын: «Так сталася, што доўгая была зіма, ацяпляльны сезон быў вельмі доўгі, і камунальны кошт узрос. Склалася так, што выдаткі на аплату камунальных былі большыя, чым звычайна. У звязку з гэтым у нас утварылася запазычанасць. Дасягнула запазычанасць такога ўзроўню, што адключылі нам святло, пакуль яна не будзе пагашаная. Я думаю, цягам тыдня, можа 10 дзён, мы гэтае пытанне вырашым, і будзе паўнавартасна функцыянаваць офіс надалей».
Па словах Янукевіча, каб падключыць памяшканне да святла, неабходна каля 3 тысяч беларускіх рублёў — гэта прыкладна $1600. Цяпер, па яго словах, ідуць перамовы з магчымымі ахвярадаўцамі. Адкрыты дабрачынны рахунак у банкаўскай разліковай сістэме АРІП, праз які сябры і прыхільнікі партыі могуць пералічыць патрэбныя грошы. Як мяркуе Янукевіч, сітуацыя з запазычанасцю хаця і вельмі непрыемная, аднак не пагражае партыі стратай офіса.
Цяпер чытаюць
Чаму ўлады маўчаць пра прычыны разбурэння дома ў Гомелі і якія ёсць версіі2
Каментары