Як зрабіць дрон амаль нябачным? Навукоўцы прапанавалі нечакана простае рашэнне
Амерыканскія даследчыкі стварылі эксперыментальны дрон, які падчас палёту становіцца амаль незаўважным. Для гэтага ім не спатрэбіліся ні спецыяльнае пакрыццё, ні аптычныя хітрыкі.
Звычайна распрацоўшчыкі імкнуцца зрабіць дроны менш прыкметнымі з дапамогай камуфляжу, спецыяльных матэрыялаў або аптычных эфектаў. Але даследчыкі з Паўночна-Заходняга ўніверсітэта ЗША вырашылі пайсці іншым шляхам. Замест таго каб хаваць апарат, яны паспрабавалі выкарыстаць асаблівасці чалавечага зроку.
Каб знайсці аптымальную канструкцыю, як паведамляе навукова-папулярнае выданне IFLScience, даследчыкі выкарысталі штучны інтэлект. Спачатку камп'ютарная мадэль згенеравала каля 20 тысяч магчымых канфігурацый дрона, здольных стабільна лятаць.
Потым алгарытмы аптымізацыі на аснове ШІ шмат разоў змянялі размяшчэнне асноўных элементаў дрона — рухавіка, прапелера, платы кіравання, процівагі і батарэй, каб знайсці аптымальную кампаноўку.
Найлепшыя варыянты праверылі ў сімуляцыі, якая прыблізна ўзнаўляла чалавечы зрок, каб ацаніць, наколькі прыкметным будзе кожны з іх. Пасля яшчэ аднаго этапу аптымізацыі даследчыкі выбралі фінальны дызайн і ўвасобілі яго ў рэальнасці.
Дрон, які атрымаў назву Phantom Twist, мае лёгкі каркас і адзін прапелер. Падчас палёту ён круціцца вакол сваёй восі з хуткасцю да 25 абаротаў за секунду. Пры такой хуткасці чалавечае вока ўжо не паспявае выразна адрозніваць яго контуры — яны размываюцца.
А паколькі большая частка канструкцыі празрыстая, нешматлікія непразрыстыя элементы візуальна зліваюцца з фонам. У выніку дрон не становіцца нябачным, але выглядае як ледзь прыкметная размытая пляма.
На думку аўтараў распрацоўкі, такі дрон можа быць карысны для назірання за дзікай прыродай, даследавання мясцовасці і агляду мастоў, будынкаў ды іншай інфраструктуры, бо менш адцягвае ўвагу сваёй прысутнасцю.
У той жа час падобная тэхналогія тэарэтычна можа выкарыстоўвацца і для схаванага назірання або ў вайсковых мэтах. Праўда, самі даследчыкі такіх сцэнароў не прапануюць і разглядаюць выключна мірнае прымяненне сваёй распрацоўкі.
Цяпер чытаюць
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?5
Каментары