Малако, згушчонка і іншая малочная прадукцыя вытворчасці Беларусі забароненыя да ўвозу ў Расію з 26 лютага.
У прыватнасці, пад забарону трапляюць малако, вяршкі, згушчанае малако, а таксама малочныя сыроватка і бялок.
У 2017 годзе Беларусь дамінавала на рынку малочнай прадукцыі Расіі. У расійскім імпарце малака і вяршкоў 92%, або 269,2 тыс. тон, паходзілі з Беларусі. Гэтаксама ў імпарце згушчанага малака і вяршкоў 78%, або 172,4 тыс. тон, ішлі з Беларусі, а таксама 82% сухога абястлушчанага малака (95 тыс. тон).
26 лютага маюць прайсці кансультацыі Рассельгаснагляда з прадстаўнікамі Мінсельгасхарча Беларусі.
У Рассельгаснаглядзе заяўляюць, што фармальна рашэнне было прынята ў сувязі з «неаднаразовымі парушэннямі ветэрынарна-санітарных патрабаванняў Еўразійскага эканамічнага саюза (ЕАЭС) і РФ». У той жа час у мінулым за такімі забаронамі заўсёды былі сукрытыя палітычныя ці эканамічныя (вызваліць месца для расійскіх вытворцаў) матывы.
