За два гады, па падліках аналітыкаў, Расія страціла больш за 3000 танкаў. Як доўга гэта можа яшчэ працягвацца?
Нямецкае выданне Neue Zürcher Zeitung адзначае, што ў вайне Расія штомесяц губляе звыш ста танкаў.
Па падліках аналітычнай групы Oryx, якія грунтуюцца на пацверджаных здымкамі фактах, на сёння іх агульная колькасць (як ліквідаваных, так і пашкоджаных і страчаных) складае 3079. Гэтая лічба больш чым у чатыры разы перавышае колькасць танкаў, якія ёсць у арсенале Германіі, Францыі і Вялікабрытаніі разам узятых.
Нягледзячы на такія страты, Расія працягвае кідаць у бой новыя бранятанкавыя калоны. Журналісты выдання паспрабавалі разабрацца, як доўга гэта можа працягвацца.
Брытанскі Міжнародны інстытут стратэгічных даследаванняў (IISS) прыводзіць лічбы, што на пачатак 2022 года расійская армія мела 2927 танкаў. Калі параўнаць іх з лічбай страчаных, то становіцца зразумела, што Расія здолела кампенсаваць страты як за кошт раскансервацыі старых запасаў, так і за кошт павелічэння вытворчасці.
Заходнія эксперты мяркуюць, што за мінулы год расійская армія атрымала да 1500 танкаў. Праўда, большасць з іх склалі раскансерваваныя танкі, якія прайшлі пэўную мадэрнізацыю. Па ацэнках заходняга вайсковага прадстаўніка, цяпер Расія выпускае толькі 200 новых танкаў на год, што толькі ўдвая перавышае даваенны ўзровень.
У сувязі з гэтым адказ на пытанне залежыць ад таго, колькі яшчэ старых танкаў знаходзіцца на захаванні і колькі з іх можна адрамантаваць.
У красавіку гэтага года, па падліках украінскіх аналітыкаў, на расійскіх складах і перад рамонтнымі майстэрнямі знаходзілася каля 4500 спраўных танкаў. У пачатку 2022 года гэтая лічба была на 2400 адзінак большай.
Такі падлік адпавядае высновам IISS і іншых экспертаў аб тым, што Расія за кожны год вайны змагла ўводзіць у эксплуатацыю па 1200 танкаў са сваіх запасаў.
Калі да лічбы ў 4500 спраўных танкаў, што знаходзяцца на складах, дадаць 2000 танкаў, якія цяпер знаходзяцца на ўзбраенні, то атрымаецца 6500. За апошнія паўгода Расія страціла толькі па пацверджаных крыніцах каля 620 адзінак. Калі да іх дадаць незарэгістраваныя страты, то лічба можа наблізіцца да 650. Атрымліваецца, што запасаў хопіць на 5 гадоў.
Па ацэнках экспертаў, крытычнай для Расіі сітуацыя стане тады, калі колькасць танкаў стане ніжэйшай за 3000. Гэта можа наступіць праз 2,7 года. Калі не ўлічваць састарэлых танкаў 1950-1960-х гадоў, то праз 2,1 года. За гэты час Расія здолее выпусціць каля 420 новых танкаў.
Такім чынам, у крытычным пункце Расія акажацца летам 2026 года. На павелічэнне тэрміну можа паўплываць пачатак паставак кітайскіх танкаў для Расіі. А скарачэнне тэрміну адбудзецца ў выпадку, калі Украіна атрымае ад Захаду больш артылерыйскіх снарадаў ці супрацьтанкавых мін.
Таксама вельмі імаверна, што старыя танкі, якія Расія аднаўляе, будуць ніжэйшай якасці. Гэта звязана з тым, што Масква ў першую чаргу забрала са складоў найбольш захаваныя экзэмпляры.
Міністэрства абароны Расіі, імаверна, разглядае аналагічныя сцэнарыі. Але невядома, якую стратэгію будзе рэкамендаваць Крамлю расійскі Генштаб, ведаючы, што ў бачнай перспектыве можа быць страчаны наступальны патэнцыял, які шмат у чым залежыць ад наяўнай баявой тэхнікі, у прыватнасці танкаў.
Сілавікі выклікаюць на размовы — што трэба ведаць1
Каментары