16 студзеня старшыні Беларускай асацыяцыі журналістаў Жанне Літвіной, а таксама галоўнаму рэдактару «Народнай волі» Іосіфу Сярэдзічу было афіцыйна прапанавана ўвайсці ў склад грамадскай каардынацыйнай рады ў сферы масавай інфармацыі.
«Напярэдадні да мяне патэлефанаваў міністар інфармацыі сп.Русакавіч, які звярнуўся з падобнай прапановай. А ў пятніцу быў атрыманы афіцыйны ліст з Савету міністраў», — кажа І.Сярэдзіч.
Галоўны рэдактар «Народнай волі» прыняў без асаблівых роздумаў гэтую прапанову.
«А якія падставы адмаўляцца? Калі нешта не спадабаецца, то заўсёды можна махнуць рукой і сысці»,— кажа ён.
Іосіф Сярэдзіч яшчэ не ведае, якія менавіта пытанні будуць разглядацца падчас працы рады. «Паколькі гэтая рада грамадская, то, натуральна, ніякія законапраекты мы прымаць не будзем. Я іду туды з канкрэтнымі прапановамі. Найперш мяне абурае тое, што нават праз 10 гадоў любы валацуга можа падаць у суд на газету, калі пабачыць там нейкую абразу на сябе. Гэтае становішча мяне хвалюе найбольш», — кажа І.Сярэдзіч.
«Быў бы ідэальны варыянт, калі б рада (калі яна будзе на нешта ўплываць) прыняла да разгляду пытанне роўных эканамічных умоваў для СМІ рознай формы ўласнасці, доступу да інфармацыі,прывядзення ў адпаведнасць з міжнароднымі нормамі і стандартамі закона «Аб СМІ«, калі б у паўнамоцтвах рады былі такія пытанні, як перарэгістрацыя, стварэнне цывілізаванага медыярынку… Але ўсё гэта пакажа час», — прыводзіць словы Жанны Літвіной сайт БАЖу.
Загад аб стварэнні каардынацыйная рада па СМІ быў падпісаны яшчэ напрыканцы кастрычніка. Асноўнымі задачамі рады з’яўляюцца: каардынацыя ўзаемадзеяння органаў дзяржаўнага кіравання, грамадскіх аб’яднанняў і іншых арганізацый, якія ажыццяўляюць сваю дзейнасць у сферы масавай інфармацыі; забеспячэнне правільнага прымянення норм закона «Аб СМІ»; разгляд спрэчных пытанняў, датычных прымянення гэтага закона і іншага заканадаўства ў сферы СМІ.
Запрашэнне Літвіной і Сярэдзіча вельмі нагадвае ўваходжанне Яраслава Раманчука і Андрэя Вардамацкага ў міжведамасную працоўную па краінавым маркетынгу.
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою14
Каментары