Мінпрацы: Наймальнік цяпер абавязаны адпускаць бацьку немаўляці ў дадатковы сацыяльны адпачынак
Наймальнік абавязаны дазволіць бацьку немаўляці да 14 дзён адпачынку. Пра гэта паведаміў намеснік міністра працы і сацыяльнай абароны Валерый Кавалькоў у эфіры праграмы «Контуры» на тэлеканале АНТ, паведамляе БелТА.
Права бацькі скарыстацца 14-дзённым сацыяльным адпачынкам да дасягнення дзіцем шасці месяцаў абумоўлена ўступленнем у сілу абноўленага Працоўнага кодэкса. «Змянілася тое, што наймальнік будзе абавязаны цяпер яго дазволіць (раней было на меркаванне наймальніка)», — растлумачыў Валерый Кавалькоў.
Таксама Кавалькоў нагадаў, што з гэтага года змяніліся ўмовы карыстання сямейным капіталам, які налічваецца пры нараджэнні трэцяга дзіцяці. Памер сямейнага капіталу цяпер вызначаецца ў беларускіх рублях, а не ў далярах, і складае 22500 рублёў. Ён будзе штогод карэкціравацца з улікам індэкса спажывецкіх цэн. Акрамя таго, прадугледжана магчымасць датэрміновага выкарыстання сродкаў — на паляпшэнне жыллёвых умоў, атрыманне адукацыі альбо медыцынскіх паслуг, у тым ліку стаматалагічных.
Яшчэ адна навіна — за прызначэннем сямейнага капіталу можна звяртацца не толькі па месцы рэгістрацыі, але і па месцы фактычнага пражывання.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары