Статкевіч: Зарэгістраваная апазіцыя ніколі не абярэ Севярынца кандыдатам, скажуць, што ён гамафоб, што на яго грошай не дадуць
Кіраўнік Беларускага нацыянальнага кангрэсу (БНК) Мікола Статкевіч патлумачыў, чаму не ўдзельнічае ў працэдуры абрання адзінага кандыдата на прэзідэнцкія выбары — 2020. Шэсць апазіцыйных партый дамовіліся між сабой, што вызначаць адзінага.
«БНК вызначыўся са сваім кандыдатам яшчэ год таму, — кажа Статкевіч. — Ім буду я. Удзельнічаць у вызначэнні адзінага з апазіцыяй, якая зарэгістраваная Лукашэнкам, ну прабачце. Рабіць так — наступаць на адны і тыя ж граблі, мы і так ужо двойчы на іх наступалі. Упершыню, калі напрыканцы 2015 года ствараўся БНК і мы прапаноўвалі ўсім сілам працаваць разам.
Другі раз — святкаванне 100-годдзя БНР, калі некаторыя лідары партый пабеглі ў Мінгарвыканкам да дробных чыноўнікаў, каб дазволілі канцэрт, у выніку чаго злілі палітычны складнік святкавання. Каб не пабеглі, то ў нас былі бы і мітынг, і канцэрт».
«Я не кажу канчатковае «не». Тым больш, што я выказваю толькі сваю ўласную пазіцыю, на БНК мы яе яе яшчэ будзем абмяркоўваць. Але паслухайце, я заклікаў сабрацца людзей 6 кастрычніка на акцыю ў абарону незалежнасці. Нібыта і пагаджаліся спачатку: так-так, прыйдзем. А ў выніку ці быў хто? Правацэнтрысцкая кааліцыя кажа: там быў наш прадстаўнік. Так, Севярынец прыйшоў, а дзе былі ўсе астатнія?
Кажу як ёсць: калі кандыдатам будзе Севярынец, то мы гатовыя супрацоўнічаць, гатовыя каардынаваць сваю дзейнасць. У выпадку адмовы ў рэгістрацыі кандыдата ад БНК гатовыя падтрымаць Севярынца. Але, апроч Севярынца, там няма людзей, якія гатовыя рызыкаваць, а без гэтага ўдзельнічаць у выбарах бессэнсоўна.
Правацэнтрысцкая кааліцыя ўжо год кажа пра праймерыз, але не праводзіць іх. А чаму? Бо Севярынец, пры ўсіх яго мінусах, стварае інфармацыйныя нагоды, стварае падзеі. Людзі яго падтрымліваюць, і я не пра бліжэйшае атачэнне, а пра людзей, што выходзяць на вуліцы па яго закліках.
Я ўпэўнены, што цяпер будуць спрабаваць абраць адзіным самага слабога кандыдата, але не Севярынца. Будуць казаць, што на яго грошы не знойдуцца, што ён гамафоб… Знойдуць тысячу прычын. Шмат у чым я ўпэўнены ў несамастойнасці гэтых арганізацый, шмат што кажа, што яны знаходзяцца ў залежнасці ад уладаў. Ды што казаць, пакуль я сядзеў у турме, яны не правялі ніводнай акцыі ў цэнтры Мінска!
Было б моцна, каб ад зарэгістраванай апазіцыі кандыдатам быў бы Севярынец, мы б з ім паразумеліся. Я даўно кажу, што сапраўдная апазіцыя сабралася ў БНК, за выключэннем Севярынца».
Каментары