Палітвязня Цімура Газізава асудзілі да двух гадоў «хіміі» і вызвалілі ў зале суда
20 верасня ў судзе Маскоўскага раёна Мінска вынеслі прысуд палітвязню Цімуру Газізаву — актывісту ініцыятывы «Сумленныя людзі». Яго затрымалі 16 чэрвеня на праглядзе анлайн-прэм'еры спектакля «Белы трус, чырвоны трус». Суддзя Сяргей Кацар прызнаў яго вінаватым паводле арт. 342 Крымінальнага кодэкса і асудзіў да двух гадоў абмежавання волі з накіраваннем у ПУАТ — «хіміі». Цімура вызвалілі ў зале суда, паведамляюць праваабаронцы.
Паводле абвінавачання, на масавым мерапрыемстве 4 кастрычніка 2020 года Цімур Газізаў наўмысна перашкаджаў працы транспарту, блакаваў дарогу, не падпарадкоўваўся законным патрабаванням супрацоўнікаў. Ён дзейнічаў сумесна і ўзгоднена з групай асоб на праспекце Дзяржынскага з 16:40 да 18:40.
Цімур не прызнае віну і ўпэўнены, што не здзяйсняў злачынства.
На пасяджэнні 20 верасня Газізаў дапоўніў свае паказанні: ён адзначыў, што абвінаваўца ўнёс у справу шмат лішняй інфармацыі, якая не датычыцца справы. Палітвязень адзначыў, што ягоны аўтамабіль таксама быў заблакаваны разам з грамадскім транспартам, а такасама тое, што ён у той дзень планаваў свой маршрут удалечыні ад цэнтра горада.
У апошнім слове Цімур Газізаў распавёў, што пакладзеныя ў аснову абвінавачання ліставанні ў тэлеграм-чатах з дэпутатамі і асабістыя працоўныя перамовы толькі падкрэсліваюць, што ён жыў і дзейнічаў законнымі метадамі і наладжваў сувязі з прадстаўнікамі ўлады. Ён упэўнены, што гэта паказвае яго як актыўнага жыхара краіны, а не чалавека, які схільны да дэкструктыўнай або экстрэмісцкай дзейнасці. Па ягоных словах, гэта могуць падкрэсліць ягоныя дачка, былая жонка, сям'я, калегі.
«Я правёў больш за пяць максімальных адміністрацыйных тэрмінаў за ўдзел у нейкім несанкцыянаваным мерапрыемстве, — сказаў Газізаў. — Гэта пазбавіла мяне магчымасці бачыць сваё дзіця і падтрымаць бацьку… Вакол шмат пішуць пра яднанне, але паралельна я сутыкнуўся з тым, што прысуд прапісаны незалежна ад вінаватасці. Хочацца разлічваць, што Высокі суд улічыць ускосныя доказы вінаватасці і нязначнасць адміністрацыйнай правіны і вынесе справядлівае рашэнне».
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1818
Каментары