Кіраўнік дэпартамента па авіяцыі Міністэрства транспарту Беларусі Арцём Сікорскі паведаміў, што целы загінулых у авіякатастрофе пад Іркуцкам беларусаў пакуль што не ідэнтыфікаваныя.
«Цяпер у нас няма інфармацыі, што целы ідэнтыфікаваныя. Паводле нашай інфармацыі, вядзецца адпаведная праца. Як толькі ўпаўнаважанымі органамі РФ будзе прынята рашэнне і будзе магчымасць забраць целы, мы пры дапамозе нашых расійскіх калег забяспечым дастаўку цел па тых кірунках, куды папросяць сваякі», — сказаў Сікорскі ў пятніцу журналістам.
Паводле яго слоў, для арганізацыі дастаўкі цел загінулых на радзіму ў Іркуцк выехаў прадстаўнік беларускай авіякампаніі «Гродна», якая эксплуатавала Ан-12, што разбіўся. «У першую чаргу мы разглядаем дастаўку цел нашых грамадзян, членаў экіпажа. З расійскімі калегамі маем зносіны па аказанні дапамогі ў дастаўцы цел пасажыраў», — дадаў Сікорскі.
У найбліжэйшыя дні «чорныя скрыні» будуць перададзеныя ў Маскву для расшыфроўкі.
Каментары