Асуджаны за рэпост уладальнік крамы беларускай сімволікі ў Баранавічах распавёў аб сваім арышце і вызваленні
Прадпрымальніка і вядомага ў горадзе актывіста Юрыя Казакевіча затрымалі ў канцы лістапада. Яго абвінавацілі ў распаўсюджванні экстрэмісцкіх матэрыялаў і асудзілі на 15 сутак. Пасля вызвалення ён распавёў Intex-press, як гэты арышт адбіўся на ім і яго жыцці.
Падставай для затрымання, ператрусу і арышту, па словах Юрыя Казакевіча, стаў рэпост «цалкам бяскрыўднай навіны» аднаго з беларускіх парталаў, прызнанага з нядаўняга часу ў Беларусі экстрэмісцкім, зроблены 14 месяцаў таму. За гэта мужчыну пасадзілі на 15 сутак, а відэа яго допыту, на якім ён распавядае пра сябе і прычыны затрымання, выклалі ў інтэрнэт.
— Следчы сказаў, што відэа трэба запісаць для ўнутранага карыстання, каб у выпадку чаго можна было зразумець, у каго што канфіскоўвалі. Таму я не чакаў, што яно будзе ў інтэрнэце, — распавёў Юрый Казакевіч. — Да практыкі апублікавання такіх відэа я стаўлюся рэзка адмоўна. Але да таго, што выклалі відэа са мной, паставіўся спакойна, бо не сказаў нічога, што зганьбіла б мяне ці магло б нашкодзіць камусьці іншаму.
З ІЧУ Баранавіцкага ГАУС, дзе адбываў прызначанае судом пакаранне, Юры выйшаў на пачатку снежня.
— Гэтыя 15 сутак сталі штуршком для змены іміджу. Я схадзіў у барбершоп, за час арышту схуднеў на чатыры кілаграмы, — кажа Юрый Казакевіч.
Выйшаўшы з ІЧУ, актывіст даведаўся, што пакуль сядзеў «на сутках», нехта ў Баранавічах збіраў для яго грошы, нібыта на перадачу ў ІЧУ. Але паколькі ніякай перадачы ў выніку ён не атрымаў, а асоба, якая збірала, нікому са знаёмых не вядомая, Юрый мяркуе, што хтосьці мог проста скарыстацца сітуацыяй у асабістых мэтах.
Цяпер Юрый Казакевіч імкнецца ўліцца ў звыклы рытм жыцця. Ён вярнуўся ў сваю краму, але справы там, па яго словах, ідуць не вельмі, бо людзі настолькі напалоханыя, што даходзіць да абсурду.
— Людзі баяцца купіць белую сукенку з чырвонай вышыўкай або нават чорную маску, на якой вышыты чырвоны сімвал, — распавядае ён. — Гэта дзіўна, бо ў маёй краме ў тым ліку прадаецца і прадукцыя дзяржаўнага прадпрыемства — Слонімскай фабрыкі мастацкіх вырабаў, якую можна знайсці ў многіх дзяржаўных крамах па ўсёй краіне.
Нягледзячы на тое, што Юрый цяпер на свабодзе, ён кажа, што не адчувае сябе ў бяспецы.
— Ні аб якой упэўненасці ў заўтрашнім дні ў наш час не можа ісці гаворкі. Я, як і многія іншыя людзі, разумею, што ў любы момант можа адбыцца ўсё што заўгодна. І гэта зусім не залежыць ад таго, праяўляў ты нейкую актыўнасць на працягу апошняга года ці не. Для абвінавачвання дастаткова перапосціць рэцэпт навагодняга салата з «няправільнай» крыніцы, — рэзюмуе ён.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары