Сфарміравана адзіная перамоўная група па далучэнні мытнага саюза Беларусі, Казахстана і Расіі да Сусветнай гандлёвай арганізацыі.
Сфарміравана адзіная перамоўная група па далучэнні мытнага саюза Беларусі, Казахстана і Расіі да Сусветнай гандлёвай арганізацыі. Яе ўзначаліў дырэктар дэпартамента гандлёвых перамоў Мінэканомразвіцця РФ Максім Мядведкаў.
Такое рашэнне прынята 12 жніўня ў Маскве паводле вынікаў сёмага пасяджэння камісіі мытнага саюза.
«Мы сфарміравалі перамоўную групу, якая складаецца з прадстаўнікоў усіх трох дзяржаў. Гэта спрактыкаваныя перамоўшчыкі, — цытуе РІА Новости першага віцэ‑прэм’ера Расіі Ігара Шувалава. — Мы зыходзім з таго, што гэтая група будзе весці перамовы аб уступленні мытнага саюза ў СГА, а таксама перамовы аб уступленні Расіі, Беларусі і Казахстана ў СГА на прымальных умовах, якія будуць узгоднены».
Шувалаў падкрэсліў, што прыярытэтам з’яўляецца «ўступленне Расіі, Беларусі і Казахстана на аднолькавых умовах і адначасова». Разам з тым ён адзначыў: «Калі бакам давядзецца прыняць якія‑небудзь іншыя рашэнні, мы да гэтых рашэнняў будзем гатовы, зыходзячы з таго, што такія рашэнні павінны быць узгоднены з кіраўнікамі дзяржаў, і мы зыходзім з таго, што стратэгічнай мэтай для ўсіх трох дзяржаў з’яўляецца ўдзел у якасці поўнага фармату, у якасці членаў у СГА».
Паводле слоў першага віцэ‑прэм’ера РФ, групе будуць нададзены ўсе паўнамоцтвы для таго, каб весці перамовы як ад імя мытнага саюза, так і ад нацыянальных урадаў. «Мы юрыдычна можам уступіць асобна, кожная з дзяржаў, у СГА. Па нейкіх пытаннях можам уступіць з мытным саюзам, гэта пытанні тэхнічных дэталяў. Галоўнае, што мы выконваем тыя рашэнні, якія адбыліся ў чэрвені гэтага года, што асобна перамовы аб уступленні ў СГА мы не вядзем», — заявіў Шувалаў.
Паводле яго слоў, група будзе канчаткова сфарміравана да 24 жніўня і «неадкладна пачне перамовы з сакратарыятам СГА».
Заява аб уступленні ў СГА адзінай мытнай тэрыторыяй была падпісана прэм’ер‑міністрамі Беларусі, Казахстана і Расіі 9 чэрвеня ў Маскве. Кіраўнікі ўрадаў заявілі, што адмаўляюцца ад вядзення нацыянальных перамоў з СГА, перамовы аб калектыўным уваходжанні ў гэтую арганізацыю будзе весці адзіная група экспертаў трох краін.
У межах уступлення ў СГА Расія да цяперашняга моманту завяршыла двухбаковыя перамовы з усімі 60 краінамі‑партнёрамі, Казахстан — з 22 краінамі, Беларусь — прыкладна з 10.
Каментуючы намер трох краін аб калектыўным уступленні ў арганізацыю, гендырэктар СГА Паскаль Ламі ў чэрвені заявіў: «Я збіты з панталыку, разгублены. Члены СГА пакуль не ведаюць, якімі будуць наступныя крокі. Для членаў СГА зараз час згуляць у сур’ёзны юрыдычны покер».
11 жніўня Ігар Шувалаў паведаміў журналістам: расійскаму боку ўдалося запэўніць структуры СГА ў тым, што пагадненне аб арганізацыі дае магчымасць групавога ўваходжання ў яе.
Каментары