Міхаіл Зыгар: Пуціна цікавіць цяпер толькі мінулае, а слухае ён толькі Юрыя Кавальчука
Расійскі журналіст і палітычны аглядальнік Міхаіл Зыгар сцвярджае, што расійскі прэзідэнт Уладзімір Пуцін цяпер пераважна мае зносіны толькі з бізнэсоўцам Юрыем Кавальчуком, і гэта мае вырашальны ўплыў на ягоныя паводзіны і рашэнні. Пра гэта Зыгар напісаў у сваёй калонцы для амерыканскага выдання New York Times, піша «Украінская праўда».
Міхаіл Зыгар — расійскі журналіст, рэжысёр і галоўны рэдактар тэлеканала «Дождь» у 2010—2015 гадах. Ён меў зносіны з шырокім колам высокапастаўленых чыноўнікаў Крамля і бізнэс-эліты Расеі і напісаў кнігу «Вся кремлевская рать», у якой паспрабаваў выкласці гісторыю ўзыходжання Пуціна да ўлады і дэталі ўзаемаадносін чальцоў крамлёўскай вярхушкі.
Цяпер Зыгару некалькі крыніц у Крамлі і з ліку бізнэс-эліты Расіі расказалі, што Пуцін амаль ні да каго не прыслухоўваецца і асабіста не мае ні з кім зносін, акрамя бізнэсоўца Юрыя Кавальчука.
Нібыта вясной і летам 2020 года, у разгар пандэміі каранавіруса ў свеце, Пуцін сядзеў на самаізаляцыі ў сваёй рэзідэнцыі на Валдаі. Зыгар кажа, што ў рэзідэнцыі ўвесь гэты час з Пуціным знаходзіўся ягоны сябар Кавальчук.
Кавальчук апынуўся ў коле блізкіх сяброў і дарадцаў Пуціна ў 1990-х гадах. Ён валодае найбольшай доляй акцый камерцыйнага банка «Банк Расія» і кантралюе некалькі дзяржаўных медыя.
Светапогляд Кавальчука расійскі журналіст апісвае як сумесь геданізму, праваслаўнага містыцызму, веры ў тэорыі змовы адносна ўсюдыіснага ўплыву ЗША.
І, па словах Зыгара, разам з Кавальчуком Пуцін таксама стаў паранаідальна захапляцца былой веліччу Расіі і планамі яе аднаўлення.
Дарадцы Пуціна распавялі Зыгару, што Пуціна раздражняюць абмеркаванні сучасных праблем эканомікі і пандэміі і ён цалкам заглыбіўся ў вывучэнне мінулага. У пацверджанне гэтага тэзіса Зыгар успамінае словы французскага дыпламата, які быў праінфармаваны пра перамовы Пуціна з французскім візаві Эманюэлем Макронам. Нібыта падчас перамоваў Пуцін выклаў Макрону доўгую лекцыю па гісторыі Расеі, і Макрон быў збянтэжаны, як на гэта рэагаваць.
Зыгар піша:
«Пуцін перакананы, што ён цяпер апынуўся ва ўнікальным гістарычным становішчы, калі ён можа аднавіць тое, што страцілі рускія ў мінулыя гады здзекаў і знявагі. У 90-я, калі Пуцін і Кавальчук пазнаёміліся, ім абодвум было складана стаць на ногі пасля распаду СССР, і дакладна такія адчуванні былі ва ўсёй краіны.
Яны лічаць, што Захад скарыстаўся слабасцю Расіі, каб пашырыць межы НАТА аж да Расіі. Паводле пераканання Пуціна, сёння сітуацыя цалкам супрацьлеглая: цяпер гэта Захад знаходзіцца ў слабой пазіцыі.
Адзіны заходні лідар, якога Пуцін да нядаўняга часу ўспрымаў сур'ёзна — гэта была канцлер Германіі Ангела Меркель. Цяпер яна сышла з пасады, і настаў час Расеі адпомсціць за мінулыя здзекі ў 90-х».
Зыгар настойвае, што ніхто не можа пахіснуць гэтай веры Пуціна, таму што ён абарваў усе сувязі і зносіны з былым колам сяброў і набліжаных дарадцаў.
Па словах журналіста, нават Ігар Сечын, кіраўнік «Раснафты», якога калісьці лічылі вельмі блізкім сябрам Пуціна, павінен знаходзіцца на карантыне на працягу 2-3 тыдняў, каб пагаварыць з расійскім прэзідэнтам сам-насам.
Журналіст дадае, што атачэнне Пуціна, дзеля ўласнай кар'еры і ўзбагачэння, цягам многіх гадоў пераконвала яго, што толькі ён здольны выратаваць Расію. Падобна на тое, што гэта паўплывала на паранаідальную веру Пуціна ва ўласную веліч і ягоную гатоўнасць да любых крокаў для аднаўлення расійскай велічы.
Крыніцы Зыгара кажуць, што, падобна, Кавальчук з Пуціным не напалоханыя санкцыямі і ізаляцыяй. Наадварот, яны лічаць, што ўвядзенне суровых санкцый, ізаляцыя Расіі і эміграцыя «ненадзейных элементаў» за мяжу толькі ўмацуюць Расію ў супрацьстаянні, што мае адбыцца.
«Яна не ў турме, а на спецдачы КДБ!» Канспіролагі накінуліся на Калеснікаву12
Каментары