«Дзімон ту-ду-ту»: у Мінску пачынаюць судзіць прадпрымальніка Глеба Гладкоўскага
У Мінскім гарадскім судзе 8 лістапада пачаўся разгляд крымінальнай справы прадпрымальніка Глеба Гладкоўскага, якога абвінавачваюць па некалькіх артыкулах Крымінальнага кодэкса, у тым ліку і за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра, паведамляе «Вясна».
Справу разглядае суддзя Святлана Чарапанава.
Палітзняволены Глеб Гладкоўскі — вядомы ў Беларусі арганізатар кіназдымкаў з паветра квадракоптарамі — быў затрыманы ў Брэсце 30 верасня 2021 года паводле справы, распачатай за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра. Вядома, што Глеб пакінуў паведамленне «Дзімон ту-ду-ту» (па матывах музыкі з фільма «Бумер»).
Ён утрымліваўся спачатку ў следчай турме ў Жодзіне, а сёлета ў сярэдзіне мая стала вядома аб пераводзе палітвязня ў СІЗА-1.
Вядома, што 37-гадовага Глеба Гладкоўскага абвінавачваюць у абразе прэзідэнта (ч. 1 арт. 368 Крымінальнага кодэкса), распальванні іншай сацыяльнай варожасці (ч. 1 арт. 130), у закліках да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Беларусі (ч. 3 арт. 361), і перашкодзе законнай прафесійнай дзейнасці журналіста (арт. 198).
Пакуль гэта ўся інфармацыя, вядомая праваабаронцам аб крымінальным пераследзе Гладкоўскага.
Памятаеце палітвязня Вітухноўскага, які пайшоў ваяваць за Расію? Ён ужо загінуў9
Каментары