У Ніжнім Ноўгарадзе айцішнік выкінуўся з балкона падчас ператрусу, абставіны вельмі цьмяныя
У расійскім Ніжнім Ноўгарадзе пры цьмяных абставінах загінуў крэатыўны дырэктар мясцовай IT-кампаніі Agima Рыгор Кочанаў. СМІ паведамляюць, што ён выпаў з балкона, калі ў ягонай кватэры праходзіў ператрус.
Мясцовыя тэлеграм-каналы сцвярджаюць, што ператрус у айцішніка праходзіў па справе «аб педафіліі». Што менавіта яму ставілася ў віну, незразумела, кажуць толькі, што ў яго нібыта знайшлі больш за 20 тэрабайт дзіцячай парнаграфіі. Але афіцыйна гэтая інфармацыя не пацверджаная.
Кочанаў нібыта адчыніў дзверы супрацоўнікам праваахоўных органаў, распісаўся ў пастанове і «не стаў аднеквацца». А калі паліцыянты пачалі праводзіць ператрус, то пайшоў на балкон і выпаў з акна.
Расійскі Следчы камітэт ад каментароў устрымліваецца, а паліцыя адпраўляе журналістаў да Следчага камітэта.
Калегі і знаёмыя Кочанава сцвярджаюць, што абвінавачанні яго ў педафіліі — поўная лухта, і даюць яму станоўчыя характарыстыкі. Пры гэтым кажуць, што загінулы публічна выступаў супраць вайны ва Украіне.
Загінулы быў даволі вядомым чалавекам у сваёй сферы. Акрамя працы ў Agima, Кочанаў вёў курсы графічнага дызайну, распрацоўваў майстар-класы па ілюстрацыі, адаптыўным вэб-дызайне і кіраванні творчым калектывам. У якасці дызайнера ён супрацоўнічаў з выдавецтвамі Cambridge University Press і Hart Publishing, часопісамі «Сноб» і «Игромания». Пад кіраўніцтвам Кочанава быў распрацаваны і запушчаны першы адаптыўны сайт у Расіі. Ён выступаў таксама спікерам найбуйнейшых расійскіх і міжнародных канферэнцый.
Цяпер чытаюць
Як склаўся лёс інтэрнацыянальных дзяцей, якіх выхоўвалі ў Жодзіне ў першым у Беларусі дзіцячым доме сямейнага тыпу?5
Каментары