У Інстытуце вывучэння вайны (ISW) прыйшлі да высновы, што прэзідэнт Расіі Уладзімір Пуцін страціў кантроль над інфармацыйнай прасторай у сваёй краіне.
У справаздачы гаворыцца, што расійскія войскі не ажыццявілі ніякіх пацверджаных прасоўванняў у межах Бахмута 11 сакавіка.
Украінскія і расійскія крыніцы працягваюць паведамляць пра жорсткія баі ў горадзе, але баевікі групы «Вагнера», верагодна, становяцца ўсё больш заціснутымі ў гарадскіх прамысловых раёнах, такіх як Арцёмаўскі завод па апрацоўцы металаў (АЗАМ), і таму ім цяжка дасягнуць значнага прасоўвання наперад.
У той жа час, адзначаюць аналітыкі, прэс-сакратарка Міністэрства замежных спраў Расіі Марыя Захарава пацвердзіла, што ва ўнутраным коле Крамля адбываецца барацьба, што Крэмль страціў цэнтралізаваны кантроль над расійскай інфармацыйнай прасторай, і што прэзідэнт Расіі Уладзімір Пуцін, відавочна, не можа гэта змяніць.
У прыватнасці, Захарава заявіла, што Крэмль не можа паўтарыць сталінскага падыходу да стварэння сучаснага аналага савецкага Інфармбюро для цэнтралізаванага кантролю над унутранай інфармацыйнай прасторай Расіі праз барацьбу паміж крамлёўскімі «элітамі».
Эксперты лічаць, што заява Захаравай пацвярджае некалькі ацэнак Інстытута: што ў Крамлі ідзе барацьба паміж ключавымі членамі найбліжэйшага атачэння Пуціна, што з часам Пуцін у значнай ступені саступіў расійскую інфармацыйную прастору і што ён не ў стане прыняць рашучыя меры для аднаўлення кантролю над расійскай інфармацыйнай прасторай.
Гаворыцца ў справаздачы і пра тое, што ўладальнік групы «Вагнер» Яўген Прыгожын заявіў, што пасля бітвы за Бахмут ён ператворыць групоўку ў жорсткую ідэалагічную элітную вайсковую арганізацыю і пачне новую хвалю вярбоўкі.
У ISW нагадваюць, што ў апошні час «група Вагнер» пашырае рэкрутынгавыя цэнтры па ўсёй Расіі, у тым ліку арыентаваныя на вярбоўку моладзі.
Спецыялісты мяркуюць, што Прыгожын, магчыма, спрабуе рэструктураваць групоўку ў жорсткую ідэалагічную элітную вайсковую арганізацыю, каб адвесці ёй асаблівую ролю сярод расійскіх войскаў ва Украіне, бо яе ранейшая роля ў забеспячэнні выключна тактычных пераваг знікае з імавернай канцэнтрацыяй групы вакол Бахмута.
Чытайце таксама: Сырскі патлумачыў, чаму Украіна не здае Бахмут
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары