«Мне ўжо паставілі дыягназ». Паліцыя змясціла Ігара Банцара ў псіхіятрычную бальніцу
Музыку і былога палітвязня Ігара Банцара змясцілі ў Варшаве ў псіхіятрычную бальніцу. Фотаздымак з геалакацыяй «Псіхіятрычная бальніца» ён размясціў у сацсетках. У каментарыі да аднаго з пастоў Банцар патлумачыў, што гэта было не яго рашэнне, піша «Белсат».
«Так, сапраўды я знаходжуся ў варшаўскай псіхушцы. Мала таго — мне ўжо паставілі дыягназ і пачалі фаршыраваць нейкай наркатой, пігулкамі нейкімі, без маёй згоды. Які дыягназ? Штосьці там нейкая шызафрэнія маніякальная. І я магу пагражаць жыццю і здароўю іншых людзей праз сваю агрэсію. Мяне забралі за беларускі акцэнт, мае чорныя пазногці, мой ружанец і мае татуіроўкі. Нібыта з-за агрэсіўных паводзінаў», — распавёў «Белсату» па тэлефоне Ігар Банцар.
З ягоных словаў, яго пазаўчора забрала паліцыя і прывезла ў шпіталь у кайданках. Затрымалі Банцара ў Варшаўскім цэнтры сямейнай дапамогі. Ён сцвярджае, што нікога нават пальцам там не крануў, але некалькі «вульгарных фразаў» сказаў. Кажа, што не быў пад уплывам алкаголю і наркотыкаў, бо ўжо даўно ад іх адмовіўся. Тэст, які зрабілі ў шпіталі, наяўнасць алкаголю ў крыві не выявіў.
Ігар Банцар знаходзіцца ў першым аддзеле псіхіятрычнага шпіталя на вуліцы Новавейскай, 27 (Nowowiejska 27) у Варшаве. Яго можна наведаць.
«Я пайду з гэтым у суд. Адназначна! Я проста так гэтага не адпушчу. І гэта будзе вельмі гучная справа», — абяцае Ігар Банцар.
Ігар Банцар просіць аб як мага шырэйшым распаўсюджванні інфармацыі.
Ігар Банцар — музыка і вакаліст гурту «Mister X». У верасні 2020 года ён станцаваў без штаноў перад міліцэйскім аўтамабілям і быў асуджаны на паўтара года «хіміі». У следчым ізалятары 16 дзён трымаў «сухую» галадоўку. Быў вызвалены 17 снежня 2021 года. У жніўні 2022 года адсядзеў 45 сутак паводле адміністрацыйнага артыкула, пасля чаго з’ехаў з Беларусі.
Чытаць таксама:
Цяпер чытаюць
Дачка дэпутата з Ашмян трапіла на дзяржслужбу. Для гэтага яна кінула неўязнога хлопца18
Каментары