Сёння пройдуць яшчэ пяць стыкавых матчаў за права выступіць летам 2010 года ў Паўднёвай Афрыцы.
Зборная Новай Зеландыі прабілася на чэмпіянат свету па футболе, што пройдзе летам 2010 года ў Паўднёвай Афрыцы.
У другім стыкавым матчы яна перамагла 5-ю каманду Азіі – зборную Бахрэйна з лікам 1:0.
Гульня прайшла 14 лістапада ў Велінгтане. Адзіны мяч на рахунку Роры Фэлан, што выступае за клуб другога англійскага дывізіёна «Плімут Аргайл».
У першым матчы ў Бахрэйне месяц таму была зафіксавана нічыя – 0:0.
«Ківі» – так называюць зборную Новай Зеландыі – аднойчы выступалі на чэмпіянаце свету, гэта было ў далёкім 1982 г. у Іспаніі.
Тады новазеландцы гулялі ў адной групе са зборнымі СССР, Бразіліі і Шатландыі і прайгралі ўсе матчы.
Сёння пройдуць яшчэ пяць стыкавых матчаў за права выступіць у Паўдневай Афрыцы,
а таксама вызначацца дзве ці тры каманды групавога турніру ў Афрыцы (можа стацца так, што зборным Егіпта і Алжыра давядзецца правесці паміж сабой стыкавы матч).
Увага аматараў футболу на постсавецкай прасторы будзе прыкутая да двух паядынкаў:
Расія – Славенія (пачатак а 18-й) і Грэцыя – Украіна (пачатак а 20-й).
Сёння таксама згуляюць: Ірландыя – Францыя (22:00) і Партугалія – Боснія (22:30).
А 4-й раніцы пачнецца матч Коста-Рыка – Уругвай (за пуцёўку на Кубак свету спрачаюцца 4-я зборная Паўночнай і Цэнтральнай Амерыкі з 5-й зборнай Паўднёвай Амерыкі).
Канал АНТ будзе паказваць у жывым эфіры матч Расія – Славенія,
на канале «Еўраспорт» апоўначы – агляд асноўных матчаў, за выняткам гульні Коста-Рыка – Уругвай.
Матчы ў адказ пройдуць 18 лістапада.
Пуцёўкі на чэмпіянат свету па футболе — 2010 па стане на суботу 14 лістапада (12:00) забраніравалі 24 зборныя з 32-х:
Паўднёва‑Афрыканская Рэспубліка (як арганізатар),
Еўропа: Англія, Данія, Галандыя, Іспанія, Італія, Германія, Славакія, Сербія, Швейцарыя.
Азія: Японія, КНДР, Рэспубліка Карэя, Аўстралія.
Афрыка: Гана, Кот Д'Івуар.
Паўднёвая Амерыка: Бразілія, Парагвай, Чылі, Аргентына.
КОНКАКАФ: Мексіка, ЗША, Гандурас.
Акіянія: Новая Зеландыя.
***
У суботу пройдзе шэраг таварыскіх матчаў.
Зборная Беларусі правядзе гасцявы матч з Саудаўскай Аравіяй.У пятніцу ў гульні другіх зборных беларусы прайгралі – 1:2.
Каментары