У ваколіцах вёскі Сакі (Жабінкаўскі раён Брэсцкай вобласці) пачаліся работы па інжынерным абсталяванні агнявых пазіцый, якія ўключаюць будаўніцтва сістэмы акопаў, траншэй і бліндажоў.
Зыходзячы з маштабаў будаўніцтва, можна зрабіць выснову, што пакуль размова ідзе пра абсталяванне апорнага пункта, які можа быць элементам умацаванага раёна, выказвае меркаванне «Беларускі Гаюн».
На будаўніцтве апорнага пункта задзейнічана ў тым ліку і цяжкая будаўнічая тэхніка (экскаватары, аўтакраны). Для абсталявання апорнага пункта плануюць выкарыстоўваць «зубы дракона», аўтамабільныя шыны, дошкі, бярвенне, а таксама бетонныя блокі. У працах бяруць удзел як «грамадзянскія» будаўнікі, так і беларускія вайскоўцы.
Адлегласць ад месца будаўніцтва да горада Жабінка складае 5 кіламетраў, да мяжы з Польшчай — 28 кіламетраў, а да мяжы з Украінай — 47 кіламетраў.
Раней ужо паведамлялася пра будаўніцтва ўмацаванага пункта каля пасёлка Калініна ў Гомельскім раёне, што за 20 кіламетраў ад мяжы з Украінай. Ён складаўся з сістэмы траншэй, акопаў, абсталяваных пазіцый для вядзення агню бранятэхнікай. Пры абсталяванні ўмацаванага раёна выкарыстоўваліся і «зубы дракона».
Умацаваны раён каля Гомеля будаваўся для дэманстрацыі чыноўнікам на штогадовым зборы «Ваенная бяспека і абарона дзяржавы», які адбыўся 26 мая. Сярод іншага падчас збору ўдзельнікі навучаліся парадку арганізацыі і вядзення абароны населеных пунктаў з апорай на падрыхтаваныя ўмацаваныя раёны.
Нягледзячы на тое, што збор скончыўся амаль месяц таму, умацаваны раён (афіцыйна — узводны апорны пункт) пад Гомелем не быў дэмантаваны. Прапагандысты раней пісалі, што цяпер яго займаюць беларускія вайскоўцы.
Каментары