Мінюст будзе адсочваць правільнае ўжыванне афіцыйнай назвы Беларусі за мяжой
Пра гэта паведаміў міністр юстыцыі Віктар Галаванаў, адказваючы 30 лістапада на пытанні журналістаў.
«Калі нейкія краіны будуць парушаць патрабаванне па афіцыйным напісанні назвы нашай краіны, то мы будзем заключаць з імі пагадненні, якія ўстараняюць гэтую памылку», — сказаў ён.
Міністр нагадаў, што на мінулым тыдні дамоўленасць аб правільным ужыванні афіцыйнай назвы Беларусі была дасягнута з міністрам юстыцыі Расіі.
Як раней паведамлялася, на пасяджэнні аб’яднанай калегіі міністэрстваў юстыцыі Беларусі і Расіі 26 лістапада ў Мінску беларускі бок ініцыяваў разгляд пытання аб прававых аспектах выкарыстання афіцыйнай назвы Рэспублікі Беларусь у актах дзяржаўных органаў Расійскай Федэрацыі. Як адзначыла намеснік міністра юстыцыі Беларусі Ала Бадак, у прававых актах Расіі выкарыстоўваюцца розныя назвы краіны — «Белоруссия» і «Беларусь». У той жа час, адзначыла яна, транслітэрацыя афіцыйнай назвы краіны на замежныя мовы павінна адбывацца ў адпаведнасці з вымаўленнем.
Міністр юстыцыі Расіі Аляксандр Канавалаў адзначыў, што ўзнятае пытанне «абсалютна не дыскусійнае».
«Я прашу прабачэння за сваіх калег, якія выкарыстоўваюць няправільную назву краіны. Я выдам распараджэнне, каб пры праверцы ўсіх нарматыўных актаў правяралася адпаведнасць правільнаму напісанню Беларусі», — сказаў ён.
Акрамя таго, Канавалаў мае намер напісаць ліст у Адміністрацыю прэзідэнта РФ з растлумачэннем пытання аб правільным ужыванні афіцыйнай назвы Беларусі.
Нагадаем, тэма афіцыйнай назвы Беларусі закраналася і падчас інтэрв’ю Дзмітрыя Мядзведзева беларускім журналістам у Барвісе 23 лістапада. На прапанову далучыцца да рэкамендацый Маскоўскага інстытута рускай мовы і называць краіну «Беларусь», а не «Белоруссия» Мядзведзеў адказаў, што якраз ён вымаўляе назву так, як гэта зафіксавана ў дакументах ААН. «Беларусь, — і я настойваю менавіта на такім вымаўленні назвы нашай брацкай дзяржавы, — гэта сапраўды самастойная дзяржава, суверэнная дзяржава, з усімі атрыбутамі самастойнай дзяржавы», — падкрэсліў расійскі лідэр. Аднак ён не стаў адмаўляць, што «ёсць асобныя выпадкі», калі прадстаўнікі расійскага істэблішменту называюць рэспубліку Белоруссией.
Цяпер чытаюць
Доктарка, якая вучылася па мэтавым накіраванні, адпрацавала паўтара года з пяці — і пераехала ў Польшчу15
Доктарка, якая вучылася па мэтавым накіраванні, адпрацавала паўтара года з пяці — і пераехала ў Польшчу
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4848
Каментары