Miniust budzie adsočvać pravilnaje ŭžyvańnie aficyjnaj nazvy Biełarusi za miažoj
Pra heta paviedamiŭ ministr justycyi Viktar Hałavanaŭ, adkazvajučy 30 listapada na pytańni žurnalistaŭ.
«Kali niejkija krainy buduć parušać patrabavańnie pa aficyjnym napisańni nazvy našaj krainy, to my budziem zaklučać ź imi pahadnieńni, jakija ŭstaraniajuć hetuju pamyłku», — skazaŭ jon.
Ministr nahadaŭ, što na minułym tydni damoŭlenaść ab pravilnym užyvańni aficyjnaj nazvy Biełarusi była dasiahnuta ź ministram justycyi Rasii.
Jak raniej paviedamlałasia, na pasiadžeńni abjadnanaj kalehii ministerstvaŭ justycyi Biełarusi i Rasii 26 listapada ŭ Minsku biełaruski bok inicyjavaŭ razhlad pytańnia ab pravavych aśpiektach vykarystańnia aficyjnaj nazvy Respubliki Biełaruś u aktach dziaržaŭnych orhanaŭ Rasijskaj Fiederacyi. Jak adznačyła namieśnik ministra justycyi Biełarusi Ała Badak, u pravavych aktach Rasii vykarystoŭvajucca roznyja nazvy krainy — «Biełoruśsija» i «Biełaruś». U toj ža čas, adznačyła jana, tranśliteracyja aficyjnaj nazvy krainy na zamiežnyja movy pavinna adbyvacca ŭ adpaviednaści z vymaŭleńniem.
Ministr justycyi Rasii Alaksandr Kanavałaŭ adznačyŭ, što ŭźniataje pytańnie «absalutna nie dyskusijnaje».
«Ja prašu prabačeńnia za svaich kaleh, jakija vykarystoŭvajuć niapravilnuju nazvu krainy. Ja vydam rasparadžeńnie, kab pry praviercy ŭsich narmatyŭnych aktaŭ praviarałasia adpaviednaść pravilnamu napisańniu Biełarusi», — skazaŭ jon.
Akramia taho, Kanavałaŭ maje namier napisać list u Administracyju prezidenta RF z rastłumačeńniem pytańnia ab pravilnym užyvańni aficyjnaj nazvy Biełarusi.
Nahadajem, tema aficyjnaj nazvy Biełarusi zakranałasia i padčas intervju Dźmitryja Miadźviedzieva biełaruskim žurnalistam u Barvisie 23 listapada. Na prapanovu dałučycca da rekamiendacyj Maskoŭskaha instytuta ruskaj movy i nazyvać krainu «Biełaruś», a nie «Biełoruśsija» Miadźviedzieŭ adkazaŭ, što jakraz jon vymaŭlaje nazvu tak, jak heta zafiksavana ŭ dakumientach AAN. «Biełaruś, — i ja nastojvaju mienavita na takim vymaŭleńni nazvy našaj brackaj dziaržavy, — heta sapraŭdy samastojnaja dziaržava, suvierennaja dziaržava, z usimi atrybutami samastojnaj dziaržavy», — padkreśliŭ rasijski lider. Adnak jon nie staŭ admaŭlać, što «jość asobnyja vypadki», kali pradstaŭniki rasijskaha isteblišmientu nazyvajuć respubliku Biełoruśsijej.
Kamientary