Паведамленне, што на фэст у Будславе прыязджаў мітрапаліт Веніямін, было памылковым
У Нацыянальным санктуарыі ў Будславе 2—4 ліпеня прайшлі традыцыйныя ўрачыстасці ў гонар Маці Божай Будслаўскай. Сёлетні фэст адзначыўся рэкорднай колькасцю пілігрымаў.
Тэлеграм-канал «Хрысціянская візія» паведамляў са спасылкай на вітальную прамову мітрапаліта Мінска-Магілёўскага архібіскупа Іосіфа Станеўскага, што галоўная святая імша 4 ліпеня прайшла з удзелам кіраўніка БПЦ мітрапаліта Веніяміна. Сцвярджалася, што, акрамя яго, на набажэнстве прысутнічалі лідары іудзейскай і ісламскай канфесій, расійскі пасол Барыс Грызлоў ды іншыя дыпламаты.
Аднак пазней тэлеграм-канал «Хрысціянская візія» апублікаваў удакладненне. Мітрапаліт Веніямін і пасол Барыс Грызлоў на фэсце не прысутнічалі — былі толькі іх прадстаўнікі. Блытаніна ўзнікла, таму што аўтары канала не зразумелі прэзентацыі гасцей падчас выступу архібіскупа Станеўскага. З кіраўнікоў канфесій на свяце насамрэч быў толькі духоўны лідар беларускіх татараў муфтый Абу-Бекір Шабановіч.
Дзяржаўны апарат таксама быў рэпрэзентаваны на нізкім узроўні — намеснікам Упаўнаважанага па справах рэлігій і нацыянальнасцей Сяргеем Герасіменям, кіраўніцтвам Мядзельскага райвыканкама, а таксама прадстаўнікамі псеўдаграмадскіх аб'яднанняў — Беларускага саюза жанчын і Фонду міру.
Мітрапаліт Мінска-Магілёўскі архібіскуп Іосіф Станеўскі. Фота: catholic.by
Начная працэсія ў Будславе. Фота: catholic.by
У сваёй пропаведзі архібіскуп Станеўскі падкрэсліў, што з гэтага года Будслаў афіцыйна стаў «духоўным цэнтрам», і адзначыў, што такі статус яму прысвоены па ініцыятыве Аляксандра Лукашэнкі. Іерарх агучыў тэзіс пра тое, што «Касцёл і дзяржава — гэта сям'я сем'яў», і падзякаваў кіраўніцтву краіны за фінансавую падтрымку. Паводле яго слоў, дасягнутая дамоўленасць аб фінансаванні рэстаўрацыі будслаўскага касцёла пасля пажару на парытэтных умовах: 50% выдаткаў бярэ на сябе дзяржава, яшчэ 50% — Касцёл. У храме ўжо адкрыты музей, а ў перспектыве плануецца пабудаваць Дом пілігрыма.
Згодна з нядаўнім указам Аляксандра Лукашэнкі аб падтрымцы «духоўных цэнтраў», з дзяржаўнага бюджэту на рэстаўрацыю праваслаўнага сабора ў Жыровічах было выдзелена 3,4 млн рублёў, а на рамонтныя работы ў каталіцкім касцёле ў Будславе — каля 260 тысяч рублёў. Пажар у Нацыянальным санктуарыі, які моцна пашкодзіў дах храма, адбыўся 11 мая 2021 года.
Нягледзячы на афіцыёз, галоўнымі ўдзельнікамі свята засталіся вернікі. Паводле афіцыйнай статыстыкі, якую агучылі пасля набажэнстваў, сёлета ў Будслаў прыбылі 2680 пілігрымаў з розных куткоў Беларусі, пераадолеўшы пешшу агулам 2717 кіламетраў. Сярод іх — 114 сем'яў з 150 дзецьмі. Самаму малодшаму пілігрыму, якога бацькі прынеслі з Мінска за пяць дзён, споўнілася ўсяго 26 дзён. Найстарэйшаму ўдзельніку пешых паходаў — 78 гадоў. Таксама ў Будслаў прыбыла першая пілігрымка на монаколах з 15 чалавек, якая праехала па маршруце Даўгінава — Будслаў.
Варта адзначыць, што 3 ліпеня, у дзень афіцыйнага дзяржаўнага свята — Дня Незалежнасці — у Будславе таксама гучалі малітвы за Беларусь, а апоўдні, як і ва ўсіх праваслаўных храмах краіны, святочна званілі званы.
Будслаўскі фэст, які ўнесены ў спіс нематэрыяльнай культурнай спадчыны ЮНЕСКА, сёлета праходзіў пад дэвізам «Слава Богу — Спадзявайся на Марыю — Вернасць касцёлу» і быў прымеркаваны да 35‑годдзя аднаўлення структур Каталіцкай царквы ў Беларусі.
Цяпер чытаюць
У Мінску прадаюць дом на вадзе. Колькі просяць за незвычайны аб'ект на Чыжоўскім вадасховішчы?3
Каментары