Аляксандр Лукашэнка 3-4 снежня будзе з рабочым візітам у Кітайскай Народнай Рэспубліцы, піша прэс-служба.
У Пекіне адбудуцца перамовы Лукашэнкі са старшынёй КНР Сі Цзіньпінам. Паводле прэс-службы, абмяркоўваць будуць пытанні гандлёва-эканамічнага, інвестыцыйнага і міжнароднага супрацоўніцтва. Таксама ў праграме — «шэраг мерапрыемстваў сацыяльна-гуманітарнага кірунку».
Лукашэнка і Сі правялі агулам 13 сустрэч — у асноўным падчас візітаў у Кітай і на палях Шанхайскай арганізацыі супрацоўніцтва (ШАС). У 2015 годзе Сі Цзіньпін прыязджаў з візітам у Мінск.
На сустрэчы ў верасні 2022 года на саміце ШАС у Самаркандзе, Беларусь і Кітай падвысілі ўзровень двухбаковых адносін да статусу ўсепагоднага і ўсебаковага стратэгічнага партнёрства (для параўнання: адносіны Кітая з Расіяй маюць статус усёабдымнага партнёрства і стратэгічнага ўзаемадзеяння).
У кастрычніку 2023 года Лукашэнка не паляцеў у Пекін на форум «Адзін пояс — адзін шлях». Яго, імаверна, не запрасілі. Афіцыйна гэта не каментавалася.
Каментары