«Прадаецца толькі на РФ». Як у Беларусі з'яўляюцца аўтамабілі з Еўропы, якія нельга набыць мясцовым
Ёсць некалькі махлярскіх схемаў. Часам чалавек можа і не ведаць, наколькі дарагое аўто ўвезлі на яго імя.
Афармленне без даверанасці
Больш за 90% аўто, якія ўвозяць фізічныя асобы ў Беларусь з трэціх краін, размытніваюцца па 140-м указе, які дазваляе аплачваць 50% мыту. Права на льготу маюць інваліды 1 і 2 групы, шматдзетныя бацькі, а таксама бацькі або апекуны дзяцей з інваліднасцю. Менавіта людзі з гэтай катэгорыі становяцца ахвярамі шэрых схем, калі аўтамабіль размытніваюць праз Беларусь, а потым накіроўваюць у Расію.
Падманваюць ільготнікаў, калі імпартуюць дарагія машыны, у тым ліку новыя. На аўтамабілі, з моманту выпуску якіх не прайшло тры гады, памер мыту залежыць не ад аб'ёму рухавіка, а ад кошту.
Напрыклад, за аўтамабіль коштам 50 тысяч еўра мыта складае 24 тысячы еўра (48% ад мытнай вартасці). А калі размытніваць яго на льготніка, то замест 24 тысяч трэба будзе заплаціць 12. Розніца каласальная, і чым даражэй аўтамабіль, тым больш адчувальнай будзе розніца ў мытным плацяжы.
Знайсці льготніка, гатовага аформіць на сабе аўто за 50, 100 і болей тысяч еўра, складана, бо такі чалавек мусіць мець вельмі высокі заробак, каб потым да яго не ўзнікала пытанняў з боку падатковай.
Таму часам дзялкі могуць нават не паведаміць ільготніку, што ад яго імя нехта купляе аўтамабіль.
Так было з інвалідам-вазочнікам першай групы, на імя якога размытнілі Porsche за 86 000 еўра. Важна, што мужчына не афармляў даверанасці.
Адзінае, што ён рабіў — перадаваў свайму знаёмаму копію пашпарта і арыгінал пасведчання інваліда, але той на наступны дзень пасведчанне вярнуў і сказаў, што здзелка не адбылася. Таму льготнік ніякай грашовай узнагароды не атрымліваў і пра тое, што на яго імя быў набыты аўтамабіль, даведаўся толькі тады, калі прыйшоў запыт з падатковай з просьбай патлумачыць, адкуль у яго даход на куплю аўто за 86 тысяч еўра.
Як высветлілася, аўтамабіль сапраўды быў размытнены не па даверанасці, а ад імя інваліда. Подпісы ў дакументах не супадалі з узорам у пашпарце, а сам мужчына праз фізічны стан не мог размытніць аўтамабіль.
Даражэзнае аўто ў Беларусі не затрымалася, а было перапрададзена ў Расію.
Аўтамабілі не даязджаюць да беларускага ДАІ
Як патлумачыў «Наша Ніве» чалавек, знаёмы з сітуацыяй, машын, якія прадаюцца на РФ адразу пасля праходжання мытнай ачысткі, абыходзячы рэгістрацыю ў ДАІ, шмат.
«Для наступнай рэгістрацыі аўто ў РФ дастаткова рукапіснай дамовы куплі-продажу. Таму нярэдка машыны, якія прывозяць пад канкрэтнага кліента з Расіі, перапрадаюць, не рэгіструючы ў беларускім ДАІ».
Суразмоўца пацвердзіў, што пры дамоўленасці з дэкларантам размытніць аўтамабіль па льгоце можна, не маючы даверанасці. Дастаткова мець копію пашпарта і арыгінал пасведчання.
«Гэта чыстае кідалава, якое можа пацягнуць на крыміналку», — лічыць суразмоўца і адзначае, што пакуль такія выпадкі даволі рэдкія.
Дарагі Mercedes замест таннага Opel
Куды больш папулярная схема падману льготнікаў выглядае інакш: льготнік афармляе даверанасць і атрымлівае ўзнагароду, але яму абяцаюць, што купяць на яго імя недарагі аўтамабіль, а насамрэч могуць набыць аўто, якое каштуе нават больш за сто тысяч.
Падобная схема зноў жа працуе толькі дзякуючы таму, што машына перапрадаецца ў Расію. У Беларусі перапрадаць аўтамабіль без пастаноўкі на ўлік у ДАІ немагчыма. Інакш бы падмануты льготнік даведаўся, што ад яго імя купілі і размытнілі не ўмоўны Opel за 10 тысяч еўра, а Mercedes за 100 тысяч.
Днямі адзін з блогераў-аўтападборшчыкаў распавядаў у інстаграме, як аглядаў машыну кліенту, але не змог набыць яе праз тое, што прадавец адмовіў у продажы для грамадзян Беларусі, спаслаўшыся на тое, што ў машыны падрыхтаваны пакет дакументаў для продажы на РФ.
Яскравы прыклад такой схемы — выпадак з жыхаром Свіслацкага раёна, які аформіў даверанасць і «набыў» сабе Porsche 911 Carrera 4S за 42 тысячы еўра.
Прэміяльны кабрыялет, размытнены на мужчыну з інваліднасцю, не ставілі на ўлік у Беларусі, а адразу зарэгістравалі ў Расіі.
Чытайце таксама:
Xiaomi прэзентавала свой першы электрамабіль
Знакаміты ліхтаршчык з Брэста паказаў свой «Масквіч-412», з якім не жадае расставацца
Кітайскія машыны замест еўрапейскіх, чэргі па Geely, люксавыя аўто для расіян. Як за год змяніўся аўтамабільны рынак
Каментары