«Беларуская мова як бы на падкорцы». Блогерка абурылася, што яе сына не вучаць роднай мове ў школе
Тыктокерка падзялілася гісторыяй, як яе сын забыў беларускую мову, хаця быццам бы мусіць ведаць яе «на падкорцы». У сацсетках абурыліся.
У тыкток-блогеркі пад нікам anastasiasolnechn8 каля 22 тысяч падпісчыкаў. Настасся робіць ролікі пра фітнэс і здаровае харчаванне, адносіны і дзяцей, і яе тыктокі звычайна набіраюць не больш за некалькі тысяч праглядаў. Але адзін з яе апошніх ролікаў заляцеў на 104 тысячы праглядаў.
Настасся — мама першакласніка. У роліку яна расказвае, што планавала не вучыць з малым урокі — маўляў, трэба прывучаць яго да самастойнасці. Нядаўна яе сын атрымаў заданне вывучыць верш па-беларуску, але ў яго не атрымалася нават прачытаць верш, дзіця не ведае беларускія літары і не разумее значэнні словаў:
«Як дзіцяці задалі вывучыць верш на беларускай мове, якая на сёння для яго з’яўляецца замежнай, ён не разумее. У мяне дома ніхто не гутарыць па-беларуску, я не гутару па-беларуску, мне няма з кім на гэтай мове гутарыць, дзіця яе не разумее. Для яго гэта насамрэч замежная мова».
Настасся абураецца, што малому проста задалі вывучыць беларускі верш і ніяк яго да гэтага не падрыхтавалі: «Я таксама думала, што маё дзіця нарадзілася ў Беларусі, беларусам, то-бок у яго як бы на падкорцы запісаная беларуская мова, але не, яно яе не разумее».
Жанчына лічыць, што навучыць яе сына беларускай — задача школы, а не яе, што ў школе малы мусіў «хаця б пачаць вучыць літары, азбуку, не ведаю, значэнне словаў нейкіх». Таксама, кажа Настасся, яе сыну мусілі патлумачыць у школе, як чытаць верш па-беларуску і што значаць беларускія словы.
Зварот блогеркі атрымаў на сёння больш за 1800 каментароў, у тым ліку на ўкраінскай мове. Тое, што для хлопчыка беларуская мова стала замежнай, карыстальнікі лічаць вельмі сумным, але ці насамрэч школа мусіць гэта выпраўляць? Шмат хто не згодны:
«Няправільна думаць, што хтосьці мусіць вучыць дзіця замест вас. Трэба пачынаць з простых казак, сапраўды з «Калабка». Гутарка важнейшая за граматыку».
«Таму што трэба было з самага дзяцінства гутарыць з дзіцём на роднай мове».
«Сорам вам, а не школе».
«А чаму вы з дзіцём не гутарылі па-беларуску?»
«Мяне пужаюць сучасныя бацькі».
У каментарах карыстальнікі дзеляцца досведам, як іх дзеці даюць рады беларускай у школе — далёка не ўсім яна даецца проста. Настассі раяць чытаць з сынам кнігі па-беларуску, а яна адзначае, што раней пра гэта не задумвалася. Каментатары адзначаюць і сумнеўнасць ідэі пра мову на падкорцы:
«А кітайская ў яго часам не на падкорцы?»
«У мяне дзеці напалову туркі, але гэта не значыць, што яны на падкорцы ведаюць турэцкую».
У сацсетцы Х (твітар) таксама абмяркоўваюць ролік. Блогерка Кацярына Хольцапфэль-Варажун, якая шмат піша пра беларускую мову, згадвае ўласную гісторыю: «І тут я ўспомніла сябе і сына, якога ў 5,5 года перавучыла за мяжой з рускай на беларускую. За паўгода ўсё атрымалася: і навучыла пісаць і чытаць. Было б жаданне. А ў гэтай жанчыны жадання няма».
Некаторыя абараняюць жанчыну: добра, што яна задумалася над гэтым пытаннем.
Ідэя пра мову на падкорцы выклікае абурэнне і ў карыстальнікаў Х:
«А гэтая «падкорка» з намі ў адным пакоі?»
«Я ў а**і: сама валіць на русязе, а дзіця павінна дзесь на падкорцы ведаць беларускую мову. Адкуль з’явіцца беларуская мова, калі з дзецьмі размаўляць на ‘вялікім магучым языке’, не глядзець фільмы/мульты, слухаць песні і чытаць ім казкі на беларускай мове?!? Людзі, алё».
«Наша Нiва» — бастыён беларушчыны
ПАДТРЫМАЦЬЧытайце таксама:
«Хай хто-небудзь ужо нарэшце скажа: трэба вывучаць беларускую як замежную мову»
Гродзенская школьніца стварыла ў тыктоку анлайн-рэпетытар па беларускай мове
Былога каліноўца, якога затрымалі ў В’етнаме, імгненна выдалі спецслужбам Лукашэнкі ФОТА53
Каментары
наш вучыўся ў былой (бо карпенка скасаваў) гімназіі, таму ангельская была кожны дзень. прычым клас дзяліўся на 3 групы. то бок куды больш увагі надавалася кожнаму вучню. а беларуская мова разы 2 на тыдзень. прычым было ў нейкіх класах, што мовы - 2 урокі на тыдзень, а языка (русского ессессенно) - 3.
класным у нас быў выкладчык беларускай мовы. пасля лета 2020-га нам памянялі класнага на... настаўніцу расейскай мовы. такая вось іронія лёсу ці як гэта назваць? мы (бацькі) пісалі, каб нам вярнулі класнага (бо яго любілі і дзеці, і бацькі), але ўсё, як разумееце, упустую. настаўніка ўвогуле адхілілі ад выкладання мовы і беларускай літаратуры (яго асноўных прадметаў), ён выкладаў потым гісторыю сусветнага мастацтва ці нешта такое... хаця ён, здаецца, быў апалітычны і ўсё такое... але вось так. уяўляеце?