«Гэта як біць асла палкай па носе». Кіт Келаг патлумачыў, навошта ЗША спынілі падтрымку Украіны
Белы дом даў Украіне «сумленнае папярэджанне» перад тым, як прэзідэнт Дональд Трамп загадаў прыпыніць вайсковую дапамогу ЗША і абмен разведданымі з Кіевам, заявіў 6 сакавіка спецпрадстаўнік прэзідэнта ЗША Дональда Трампа ва Украіне Кіт Келаг. Ён таксама сказаў, што гэтая паўза ўжо ўплывае на Кіеў, і дадаў, што ўкраінцы «самі ў гэтым вінаватыя», піша Украінская служба Бі-бі-сі.
Журналіст спытаўся ў Кіта Келага, як паўплывае на Украіну спыненне вайсковай дапамогі і надання разведданых, і навошта ЗША гэта зрабілі. Келаг параўнаў поўнае прыпыненне дапамогі з тым, як жывёліну б'юць па мордзе, каб прыцягнуць яе ўвагу.
«Найлепшы спосаб апісаць гэта, — гэта як біць асла палкай па носе, — сказаў Келаг на мерапрыемстве ў Радзе па міжнародных адносінах. — Так вы прыцягнеце яго ўвагу».
Ён прывёў яшчэ адзін прыклад, у якім параўнаў размову з украінцамі з тым, як два ягоныя ўнукі спрабуюць прыцягнуць ягоную ўвагу, калі ён адхіляецца ад размовы, хапаючы яго за твар і кажучы: «Дзядуля, дзядуля, ну паслухай».
Келаг падкрэсліў, што гэта толькі паўза. Ён адкрыта сказаў, што спыненне вайсковай дапамогі Украіне — гэта ціск, каб прыцягнуць Украіну за стол перамоў на ўласных умовах.
Ён таксама расказаў, што перад сустрэчай у Авальным кабінеце на мінулым тыдні ўкраінцам выразна далі зразумець, што перамовы будуць сканцэнтраваны на падпісанні важнага пагаднення па карысных выкапнях.
«Мы ім сказалі: «Вось такая арганізацыя: вось што вы павінны сказаць, вы заходзіце, ёсць пагадненне пра металы, вы падпісваеце пагадненне, потым абед, прэс-канферэнцыя, і вы можаце быць вольныя», — апісаў Келаг падрыхтоўчую сустрэчу з удзелам 13 сенатараў.
Пасля, з ягоных слоў, сустрэча прэзідэнтаў у выніку сарвалася, таму што Зяленскі пачаў прымушаць Трампа, які спрабуе адыграць ролю пасярэдніка ў дасягненні міру паміж Украінай і Расеяй, стаць на бок Кіева.
«Гэта ператварылася ў прэс-канферэнцыю на 50 хвілін. Мы сказалі, гэта не тое, што павінна было быць, вы не павінны былі ператвараць гэта ў публічнае абмеркаванне мірных планаў, вам не трэба было чэленджыць прэзідэнта публічна. Украінскі бок быў пра гэта папярэджаны», — дадаў Келаг.
«Тое, што адбылося, гэта як бы сказаць з боку прэзідэнта ЗША — добра, вы хочаце гэтага? Будзем гуляць у realpolitik», — сказаў Келаг.
Фактычна ён прызнаў, што ўсе праблемы з пастаўкамі і жыццёва важнымі разведданымі выкліканыя менавіта той сваркай.
ЗША працягваюць перадаваць Украіне разведданыя, але ў абмежаваным аб'ёме
Трамп заявіў, што яму больш складана дамаўляцца з Украінай, чым з Расіяй
Сенатары-рэспубліканцы заклікаюць Трампа аднавіць дапамогу Украіне і яе доступ да разведданых
Залужны: ЗША руйнуюць сусветны парадак, а Расія прыйдзе па Еўропу
Дзяржсакратар Рубіа: Спыненне вайны ва Украіне запатрабуе саступак з абодвух бакоў
ЗША адключылі Украіне цэлепаказальнікі для HIMARS
«Туман вайны стане для УСУ значна больш густым». Да чаго можа прывесці адмова ЗША перадаваць свае разведданыя Украіне
Каментары
Блазаны.
Колькі людзей не маюць уласнай годнасці і толькі глядзяць у рот свайму босу/"бацьку", апраўдваюць яго дурасці...