Я выпадкова наеўся лічынак харчовай молі разам з ежай — гэта небяспечна? Адказ нечаканы
Амаль у кожнага на кухні хоць раз заводзіліся лічынкі. А што будзе, калі не заўважыў і паеў такую страву, а заўважыў ужо пад канец? І як пазбавіцца ад шкоднікаў? Распавядаем.
![](http://nashaniva.com/img/w840d4webp1/photos/z_2024_08/turdus_migratorius_with_worms_1111-8y27h.jpg.webp)
Хто жыве на нашай кухні?
Насамрэч не ўсё, што мы называем «лічынкамі харчовай молі» — гэта сапраўды від Sitotroga cerealella. Тое, што называецца харчовай моллю, часцяком гэта так званая індыйская моль, вядомая таксама як паўднёвая свірнавая агнёўка, ды мельнічная агнёўка, якую называюць міжморскай мучной моллю.
Водзяцца ў нас і розныя віды даўганосікаў ды мукаедаў, некаторыя з якіх лётаюць. Некаторыя з іх ядуць нават прыправы кшталту вострага перца! Лічынкі гэтых відаў неспецыялісту адрозніць цяжка, пакуль яны не выраслі.
Праблема ў тым, што лічынкі хаваюцца ўнутры ежы. Зразумець, што страва не ў парадку можна па «павуцінні» ў ежы або наяўнасці там насякомых. Заўважыць іх можа быць няпроста, бо частка з відаў хаваецца ўнутры зерня або ў самым нізе.
![](http://nashaniva.com/img/w732d4webp1/photos/z_2024_08/photo_2024-08-121658371-ayu87.jpeg.webp)
Акрамя таго, некаторыя віды могуць прагрызаць папяровую ўпакоўку ды тонкі пластык, таму могуць быць і ў прадуктах проста з крамы.
Але ці небяспечна іх есці?
Добрая навіна ў тым, што амаль заўжды адказ — не. Яны не пераносяць аніякіх хваробаў і ніводны з тых, што водзіцца ў Беларусі, не атрутны.
Адзінае, што з вамі можа здарыцца — алергія, але яна выключна рэдкая. Калі яна здарылася, то варта звярнуцца да медыкаў.
Энтамолаг і дыетолаг Скай Блэкберн у інтэрв'ю The Guardian распавёў, што такая «ежа» нават можа быць карыснай. «Гэта дадатковы бялок. Сярэднестатыстычны чалавек з'ядае каля 250 грамаў насякомых штогод!» — кажа навуковец. Скай нават адкрыў бізнэс па вырошчванні спажыўных насякомых.
А на форуме Quora жартуюць, што так можна далучыцца да руху людзей, якія размнажаюць і ядуць насякомых замест мяса ў якасці крыніцы бялкоў.
Але ежу, якая тэарэтычна можа ўтрымліваць лічынкі (калі вы не ведаеце, але яна пастаяла доўга адкрытай) варта гатаваць не менш за 15 хвілінаў — тады вас у талерцы дакладна не чакае жывы «сюрпрыз».
А як яе пазбавіцца?
![](http://nashaniva.com/img/w732d4webp1/photos/z_2024_08/csiro_scienceimage_2458_indian_meal_moth11-rbxq0.jpg.webp)
У прамысловых маштабах гэта робіцца з дапамогай пестыцыдаў і ядаў. Але на вашай кухні прымяняць іх адназначна нельга.
Калі вы знайшлі такіх гасцей, то пераглядзіце ўсе вашы адкрытыя сухія прадукты. Хутчэй за ўсё, у частцы з іх таксама будуць паразіты.
Для гэтага павысыпайце іх у нейкую тару і ўважліва пераглядзіце — у іх будуць дарослыя асобіны, лічынкі або павуцінкі, якія робяць лічынкі. Выкіньце яе адразу на вуліцу.
Пасля прыборкі памыйце ўсе паліцы ды вычысціце адтуль ежу і кроплі вадкасцяў. Скарыстайцеся пыласосам, каб выдаліць рэшткі лічынак і кукалак. Звярніце асаблівую ўвагу на куты шафаў.
![](http://nashaniva.com/img/w732d4webp1/photos/z_2024_08/sitophilus-granarius-tp03-ezgifcom-webp-to-jpg-converter11-7nhbl.jpg.webp)
Перакладзіце ўсю ежу ў герметычныя пластыкавыя або шкляныя кантэйнеры. Не забывайцеся іх шчыльна закрываць.
Эксперты раяць не купляць зашмат ежы на запас, нават калі гэта троху танней. Імавернасць таго, што вы адшукаеце ў ёй шкоднікаў, у такім разе значна меншая.
Таксама ў інтэрнэце прадаюцца адмысловыя пасткі і рэпеленты ад молі. Кажуць, што дапамагае таксама раскласці лаўровы ліст у шафах з ежай, але гэты спосаб мы не правяралі.
«Наша Нiва» — бастыён беларушчыны
ПАДТРЫМАЦЬ
Каментары
Перац з цыбулей пякуць, але іх ядуць.
А чым чэрві хужэй ?