Дзіцячага анколага з 23-гадовым стажам Алену Шарафановіч не сталі адпраўляць у калонію — яна будзе на хіміі
Жанчыну судзілі месяц назад, але вынік суда быў невядомы.
Адна з найлепшых дзіцячых анколагаў Беларусі Алена Шарафановіч з'явілася ў міліцэйскім «спісе экстрэмістаў».
Гэта значыць, што вынесены ёй прысуд набыў моц.
Алену Шарафановіч судзілі ў канцы 2024 года. Ёй інкрымінавалі народны артыкул 342 — удзел у пратэстах.
Дакладны прысуд невядомы, але жанчына на волі. У базе «экстрэмістаў» насупраць яе імені стаіць пазнака «судзімасць не пагашаная». Гэта значыць, што яе адправілі на хатнюю хімію. Такі ж статус у мужа доктаркі Руслана Шарафановіча.
У тых, каго адпраўляюць у калонію, ці хто знаходзіцца на хіміі з накіраваннем, стаіць іншая пазнака, «адбывае пакаранне».
Алена Шарафановіч скончыла Мінскі медыцынскі інстытут (2001) і аспірантуру Беларускай медыцынскай акадэміі паслядыпломнай адукацыі па спецыяльнасці «анкалогія» (2019). Шэсць разоў праходзіла курсы павышэння кваліфікацыі, стажыравалася ў Германіі і ЗША.
13 гадоў працавала ў Цэнтры дзіцячай анкалогіі, гематалогіі і імуналогіі ў Бараўлянах, яшчэ 3 гады ў РНПЦ дзіцячай хірургіі. Адначасова вяла прыём у «Ладэ», Цэнтры лазернай дэрматалогіі «HappyDerm».
Каментары
Не "народны", а лукашысцкі, антынародны.