У Мінск едзе новы кіраўнік фонду Адэнаўэра Ханс‑Герт Пётэрынг
11—13 лютага Мінск наведае новы старшыня фонду Конрада Адэнаўэра, былы кіраўнік Еўрапарламента Ханс‑Герт Пётэрынг.
Як паведамляе прэс‑служба фонду, гэта першая замежная паездка Пётэрынга, мэта якой — даць «выразны і ясны сігнал падтрымкі дэмакратычнай апазіцыі краіны».
Напярэдадні ад’езду Пётэрынг заявіў, што «еўрапейцы не могуць дазволіць сабе пакінуць спробы і не падтрымаць дэмакратаў апошняй дыктатуры Еўропы, якіх становіцца ўсё больш».
Каб азнаёміцца з палітычнай і грамадскай сітуацыяй у Беларусі,
Пётэрынг плануе сустрэцца з кіраўніцтвам праваслаўнай і каталіцкай цэркваў, прадстаўнікамі трэцяга сектара і праваабаронцамі.
«На фоне асцярожнага адкрыцця Беларусі насустрач Еўрасаюзу кіраўнік фонду Адэнаўэра бачыць рэальную магчымасць спрыяць дэмакратызацыі краіны праз пастаянны абмен меркаваннямі і канкрэтныя агульныя захады, а таксама пры падтрымцы тых сіл у адміністрацыі, якія зацікаўлены ў рэформах», — гаворыцца ў паведамленні для прэсы.
У паездцы ў Беларусь Пётэрынга будзе суправаджаць польскі дэпутат, кіраўнік дэлегацыі Еўрапарламента Яцэк Пратасевіч.
Варта адзначыць, што нямецкія палітычныя фонды арыентуюцца ў сваёй дзейнасці на палітычную лінію прадстаўленых у бундэстагу партый. Фонд імя Конрада Адэнаўэра блізкі да Хрысціянска‑дэмакратычнага саюза. Пры гэтым фонд фактычна з’яўляецца незалежнай грамадскай арганізацыяй і фінансуецца з бюджэту ФРГ.
Бюро фонду па Беларусі знаходзіцца ў Вільні, яго ўзначальвае Штэфан Малерыус.
Каментары