Матацыкліст разагнаўся да 199 км/г і збіў дзіця на пераходзе. Падрабязнасці жахлівага ДТЗ пад Кобрынам
Трагедыя адбылася на трасе М1 19 ліпеня. Матацыкліст і дзіця загінулі.
Сталі вядомыя падрабязнасці смяротнага ДТЗ на трасе М1 каля вёскі Іласк Кобрынскага раёна. 19 ліпеня 28-гадовы матацыкліст збіў на трасе 13-гадовага хлопчыка на пешаходным пераходзе. У выніку сутыкнення абодва загінулі.
На месцы здарэння следчыя ўбачылі, што целы загінулых знаходзіліся на значным аддаленні ад месца ДТЗ. Так, цела матацыкліста знайшлі за 99 метраў ад месца сутыкнення, цела хлопчыка — за 60 метраў. Матацыкл быў знойдзены на адлегласці звыш 390 метраў, на ім адсутнічалі рэгістрацыйныя знакі. Следавая карціна сведчыла пра тое, што хуткасць мотатранспарту была кардынальна вышэйшая за дапушчальныя 80 км/г.
Следства ўстанавіла, што матацыкліст перад сутыкненнем разагнаўся да хуткасці 199 км/г.
«Па крымінальнай справе ў якасці сведак дапытаныя кіроўцы аўтамабіляў, якія з'яўляліся відавочцамі аварыі. Яны расказалі, што пад'язджалі да пешаходнага пераходу, а ў гэты час па правай паласе разгону іх на высокай хуткасці апярэдзіў матацыкл. Затым яны ўбачылі ўспышку з датчыка кантролю парушэнняў, а пасля — воблака пылу і дыму. Убачыўшы наступствы ДТЗ, яны выклікалі міліцыю і хуткую медыцынскую дапамогу», — паведамляе Следчы камітэт.
Матацыкліст падчас ДТЗ быў цвярозы, у яго ў крыві не было знойдзена слядоў этылавага спірту. Следчыя вызначылі, што матацыкліст меў магчымасць затармазіць да пешаходнага пераходу, калі б ехаў на максімальна дазволенай хуткасці ў 80 км/г.
Вядома таксама, што раней кіроўца матацыкла неаднаразова выязджаў на трасу паганяць. Перад гэтым ён здымаў нумары з матацыкла.
Загінулы хлопчык вучыўся ў 8 класе сярэдняй школы Брэста, займаўся спортам. На летнія канікулы прыехаў у вёску да бабулі і па вечарах любіў вячэрнія прабежкі і пешыя прагулкі.
Вінаватым у ДТЗ прызнаны матацыкліст, які «пры пад'ездзе да нерэгуляванага пешаходнага пераходу перавысіў хуткасць, праявіў злачынную нядбайнасць, няўважлівасць і неабачлівасць да дарожнай абстаноўкі і яе зменаў, не быў гатовы знізіць хуткасць руху і спыніцца, каб выключыць верагоднасць наезду на дзіця, хоць абавязаны быў гэта зрабіць і меў такую магчымасць».
Крымінальная справа спыненая ў сувязі са смерцю кіроўцы матацыкла.
Каментары