Эстонскі кінолаг расказаў, як яго сабака шукаў зніклага амерыканскага салдата на палігоне ў Падброддзі і выдатна справіўся
Сабака па мянушцы Майк упершыню ляцеў на вайсковым верталёце і адпрацаваў як на сушы, так і на вадзе.
Эстонскі кінолаг Рыста Коткас распавёў пра ўдзел сваёй каманды ў пошуках зніклага амерыканскага салдата падчас вучэнняў у Літве. У эфіры перадачы Terevisioon ён адзначыў, што службовы сабака па мянушцы Майк з гонарам справіўся з пастаўленай задачай, пераказвае LRT.
«У пачатку тыдня мы атрымалі паведамленне, што нашым літоўскім калегам патрэбна дапамога ў пошуку зніклага вайскоўца ЗША. Гэта быў першы вопыт палёту на ваенным верталёце для нашых сабак, у тым ліку для Майка — чатырохгадовага сабакі без папярэдняга досведу такіх перамяшчэнняў. Але палёт прайшоў спакойна: сабакі не скуголілі, не брахалі — стрэсу амаль не было», — распавёў Коткас.
Майк працаваў не толькі на сушы, але і на вадзе. Паводле кінолага, пошукі на вадзе патрабуюць асаблівай арганізацыі, усё падпарадкоўваецца патрэбам сабакі: «У гэты момант, напрыклад, экскаватары не могуць працаваць побач, каб не перашкаджаць».
Другі сабака з каманды, Тыйт, знаходзіўся ў рэзерве. Абодва сабакі прайшлі падрыхтоўку для пошуку як жывых, так і загінулых людзей. «Майк быў асноўным у гэтым заданні. Ён поўны энергіі і не разумее, чаму зараз нічога не адбываецца. Нават у студыі ён скуголіць — яму хочацца працаваць», — кажа Коткас.
Службовы сабака не толькі дакладна выканаў задачу, але і, паводле гаспадара, адчуў задавальненне ад сваёй працы. «Для яго гэта быў асабісты поспех — ён зразумеў, што справіўся», — падсумаваў кінолаг.
Гусенічная выратавальная машына M88 Hercules з чатырма амерыканскімі вайскоўцамі знікла падчас вучэнняў на палігоне ў Падброддзі каля мяжы з Беларуссю 25 сакавіка. Праз дзень тэхніку знайшлі на глыбіні каля пяці метраў у забалочанай мясцовасці.
Раніцай 31 сакавіка патанулую ў балоце амерыканскую бронемашыну выцягнулі, пракуратура пачала дасудовае расследаванне па факце гібелі вайскоўцаў, якія знаходзіліся ў ёй. Але спярша знойдзеных вайскоўцаў было толькі трое, а чацвёрты па-ранейшаму лічыўся зніклым без вестак. 1 красавіка знайшлі і яго.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары
[Зрэдагавана]